Фото: РИА «Новости»

Россиянинг Оренбург вилояти губернатори Денис Паслернинг илтимосига кўра, ҳарбийлар Орскдаги сув тошқинига қарши курашда ёрдамга жалб қилинди.

“Ясненский ракета конструкциясининг ҳарбий муҳандислари сув тошқинларига қарши курашда ёрдам бериш учун Орск шаҳрига етиб келишди. Ҳарбий хизматчилар Орск шаҳри яқинидаги шикастланган тўғонга ичимлик суви ва тупроқ ташийди, шунингдек, маҳаллий аҳолини хавфсиз жойга эвакуация қилишда иштирок этади”, — дейилади хабарда.

Фавқулодда вазиятга 100 дан ортиқ ҳарбий хизматчи ва 18 та махсус техника – самосваллар, бульдозерлар, экскаваторлар жалб этилган. Бундан ташқари, Ясненский ракета тузилмаси ходимлари минтақадаги дарёлар қирғоқларини мустаҳкамлайди.

Оренбургдаги сув тошқини
Шу йилнинг 5 апрель куни Орскда Урал дарёсининг тўғони бузилиб, шаҳарнинг бир қисмини сув тошқини зонасида қолдирди. Сўнгги маълумотларга кўра, 6641 та турар-жой биноси сув остида қолмоқда. Расмийлар Лесоторговй қишлоғи ва Новотроитск шаҳри эвакуация қилинишини эълон қилди.

Оренбургда вазият ёмонлашмоқда. Шаҳар мэри Сергей Салмин шаҳарда мисли кўрилмаган сув тошқини кутилаётгани ҳақида огоҳлантирди ва сув босган ҳудудлар аҳолисини ихтиёрий равишда тарк этишни, акс ҳолда улар полиция иштирокида олиб чиқилишини талаб қилди.

Умуман олганда, сув тошқини 27 та муниципалитетга зарар етказди. Оренбург вилояти маъмурияти тошқиннинг энг юқори чўққиси 10 апрель куни кутилаётгани, 20 апрелдан кейин вазият барқарорлашишини маълум қилди. Минтақада федерал фавқулодда ҳолат режими амал қилади.

Президент Владимир Путин душанба куни Оренбург, Курган ва Тюмен вилоятларида сув тошқини билан боғлиқ вазият бўйича ҳисоботларни эшитди ва Фавқулодда вазиятлар вазирлиги раҳбари Александр Куренков бошчилигидаги махсус комиссия тузишни буюрди.

Олдинроқ, тошқин туфайли Урал дарёсида сув сатҳи кунига 16 см га ошиб, 872 см га етгани маълум қилинганди.