Orskdagi suv toshqiniga qarshi kurashishga harbiylar ham jalb etildi

16:51 08 Aprel 2024 Dunyo
444 0

Foto: РИА «Новости»

Rossiyaning Orenburg viloyati gubernatori Denis Paslerning iltimosiga koʻra, harbiylar Orskdagi suv toshqiniga qarshi kurashda yordamga jalb qilindi.

“Yasnenskiy raketa konstruksiyasining harbiy muhandislari suv toshqinlariga qarshi kurashda yordam berish uchun Orsk shahriga yetib kelishdi. Harbiy xizmatchilar Orsk shahri yaqinidagi shikastlangan toʻgʻonga ichimlik suvi va tuproq tashiydi, shuningdek, mahalliy aholini xavfsiz joyga evakuatsiya qilishda ishtirok etadi”, — deyiladi xabarda.

Favqulodda vaziyatga 100 dan ortiq harbiy xizmatchi va 18 ta maxsus texnika – samosvallar, buldozerlar, ekskavatorlar jalb etilgan. Bundan tashqari, Yasnenskiy raketa tuzilmasi xodimlari mintaqadagi daryolar qirgʻoqlarini mustahkamlaydi.

Orenburgdagi suv toshqini
Shu yilning 5-aprel kuni Orskda Ural daryosining toʻgʻoni buzilib, shaharning bir qismini suv toshqini zonasida qoldirdi. Soʻnggi maʼlumotlarga koʻra, 6641 ta turar-joy binosi suv ostida qolmoqda. Rasmiylar Lesotorgovy qishlogʻi va Novotroitsk shahri evakuatsiya qilinishini eʼlon qildi.

Orenburgda vaziyat yomonlashmoqda. Shahar meri Sergey Salmin shaharda misli koʻrilmagan suv toshqini kutilayotgani haqida ogohlantirdi va suv bosgan hududlar aholisini ixtiyoriy ravishda tark etishni, aks holda ular politsiya ishtirokida olib chiqilishini talab qildi.

Umuman olganda, suv toshqini 27 ta munitsipalitetga zarar yetkazdi. Orenburg viloyati maʼmuriyati toshqinning eng yuqori choʻqqisi 10-aprel kuni kutilayotgani, 20-apreldan keyin vaziyat barqarorlashishini maʼlum qildi. Mintaqada federal favqulodda holat rejimi amal qiladi.

Prezident Vladimir Putin dushanba kuni Orenburg, Kurgan va Tyumen viloyatlarida suv toshqini bilan bogʻliq vaziyat boʻyicha hisobotlarni eshitdi va Favqulodda vaziyatlar vazirligi rahbari Aleksandr Kurenkov boshchiligidagi maxsus komissiya tuzishni buyurdi.

Oldinroq, toshqin tufayli Ural daryosida suv sathi kuniga 16 sm ga oshib, 872 sm ga yetgani maʼlum qilingandi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер