Toshkent shahridagi “Beshqoʻrgʻon” bozorining (“Risoviy” bozori) binolari va yer maydoni E-auksion savdo platformasi orqali auksionga qoʻyildi.

Davlat aktivlarini boshqarish agentligi Toshkent shahar hududiy boshqarmasi tomonidan Vazirlar Mahkamasining 2024-yil 10-iyuldagi 411-son qarori asosida sotuvga qoʻyilgan “Fargʻona” yoʻli va “Abdurauf Fitrat” koʻchalari kesishmasida joylashgan lotning boshlangʻich narxi 15,94 milliard soʻm etib belgilangan.

Xaridor bu yerda zamonaviy savdo majmuasi, “ekobozor”, koʻngilochar maskanlar, biznes markaz, ofis va xizmat koʻrsatish maydonlari, shuningdek, avtoturargoh qurishi kerak. Qurilish ishlari maxsus loyihalash tashkiloti tomonidan ishlab chiqilgan master-reja asosida amalga oshiriladi. Arizalar 28-aprel kuni soat 09:00 gacha qabul qilinadi, natijalar esa 10:00 da eʼlon qilinadi.

Avvalroq, oʻtgan yilning noyabr oyida “Askiya” bozori ham auksionga qoʻyilib, 15 daqiqa davom etgan auksionda 225,59 milliard soʻmlik bitta stavkadan soʻng yakunlanib, Xitoyning “Sheng Ke-International” kompaniyasiga sotilgandi.