Saminjon HUSANOV/“Xalq soʻzi”. Andijon viloyatida 2024-yilda mavjud 909 ta mahallada 90 ming 250 nafar xotin-qiz “Ayollar daftari”ga kiritilib, shulardan 90 ming 136 nafariga moddiy yordam koʻrsatildi. Bu haqida viloyat Oila va xotin-qizlar boshqarmasida boʻlib oʻtgan yigʻilishda maʼlum qilindi.

— Oʻtgan yilda ishsiz xotin-qizlar bandligini taʼminlash, ayniqsa, ularni tadbirkorlikka jalb etish masalasiga alohida eʼtibor qaratildi, — deydi boshqarma boshligʻi Gulnoraxon Ahmedova. — Natijada 139 ming 877 nafar xotin-qizning bandligi taʼminlandi. Tadbirkorlikka jalb qilish hamda Bandlikka koʻmaklashish davlat jamgʻarmalari hisobidan 4 ming 967 nafar xotin-qizga turli yoʻnalishlarda oʻz tadbirkorligini yoʻlga qoʻyish uchun 27,7 milliard soʻm miqdorida subsidiya mablagʻi berildi. Bundan tashqari, 19 ming 78 nafar xotin-qizga biznes-loyihalarini amalga oshirish uchun 417,1 milliard soʻm miqdorida kreditlar ajratildi.

Yigʻilishda “Ayollar daftari” orqali xotin-qizlarni qoʻllab-quvvatlash, oilalarni mustahkamlash va undagi maʼnaviy muhitni yaxshilash, ajrimlarning oldini olish, yoshlarni oilaviy hayotga tayyorlash, xotin-qizlar oʻrtasida jinoyatchilik va huquqbuzarliklarga yoʻl qoʻymaslik borasida bajarilgan ishlar tahlil qilinib, navbatdagi vazifalar belgilab olindi.