Саминжон ҲУСАНОВ/«Халқ сўзи». Андижон вилоятида 2024 йилда мавжуд 909 та маҳаллада 90 минг 250 нафар хотин-қиз “Аёллар дафтари”га киритилиб, шулардан 90 минг 136 нафарига моддий ёрдам кўрсатилди. Бу ҳақида вилоят Оила ва хотин-қизлар бошқармасида бўлиб ўтган йиғилишда маълум қилинди.

— Ўтган йилда ишсиз хотин-қизлар бандлигини таъминлаш, айниқса, уларни тадбиркорликка жалб этиш масаласига алоҳида эътибор қаратилди, — дейди бошқарма бошлиғи Гулнорахон Аҳмедова. — Натижада 139 минг 877 нафар хотин-қизнинг бандлиги таъминланди. Тадбиркорликка жалб қилиш ҳамда Бандликка кўмаклашиш давлат жамғармалари ҳисобидан 4 минг 967 нафар хотин-қизга турли йўналишларда ўз тадбиркорлигини йўлга қўйиш учун 27,7 миллиард сўм миқдорида субсидия маблағи берилди. Бундан ташқари, 19 минг 78 нафар хотин-қизга бизнес-лойиҳаларини амалга ошириш учун 417,1 миллиард сўм миқдорида кредитлар ажратилди.

Йиғилишда “Аёллар дафтари” орқали хотин-қизларни қўллаб-қувватлаш, оилаларни мустаҳкамлаш ва ундаги маънавий муҳитни яхшилаш, ажримларнинг олдини олиш, ёшларни оилавий ҳаётга тайёрлаш, хотин-қизлар ўртасида жиноятчилик ва ҳуқуқбузарликларга йўл қўймаслик борасида бажарилган ишлар таҳлил қилиниб, навбатдаги вазифалар белгилаб олинди.