Маълумки, 19 январь куни АҚШнинг Лос-Анжелес шаҳрида «UFC 311» турнири бўлиб ўтади. Кутилмаганда мазкур турнирнинг марказий жанги ҳисобланган Ислам Махачев ва Арман Царукян ўртасидаги тўқнашув бекор қилинди. Бунга Царукяннинг вазн ташлаш жараёнида олган жароҳати сабаб бўлди. Энди Исламга янги рақиб — бразилиялик Ренато Мойкано қарши туради.

Арман Царукяннинг чиқиши бекор қилингани ҳақидаги хабар унинг ўзи томонидан тасдиқланди. У ижтимоий тармоқдаги саҳифасида шундай баёнот берди: «Афсус билан шуни маълум қилмоқчиманки, вазн ташлаш жараёнида белимдан олган жароҳатим сабаб «UFC 311» турнирида иштирок эта олмайман. Ҳа, шундай бўлиб қолди. Бу менинг фаолиятимдаги энг қийин қарор бўлди. Промоушен раҳбарларига мени тушуниб, қўллаб-қувватлаганлари учун миннатдорлик билдираман. Сабрсизлик билан кейинги чемпионлик имкониятини кутаман», деди Царукян.

Ислам Махачев Царукяннинг сафдан чиқишига нисбатан ўз фикрини билдириб, янги рақиб билан жангга тайёр эканини маълум қилди. «Бу чемпионлик камари ўзида нимани мужассам этган? Титул сен дунёнинг энг яхшиси эканингни англатади. Агар сен энг зўри бўлсанг, кимни рақиб сифатида беришларининг аҳамияти йўқ. Нима дейишим керак? Йўқ? Ҳеч қачон! Келинглар, буни амалга оширамиз!» деди у.

Шунингдек, у UFC раҳбари Дана Уайтга мурожаат қилди: «Дана Уайт, энди сен энг яхши П4П жангчиси ким эканини биласан», деди у ижтимоий тармоқдаги мурожаатида. Царукяннинг жангдан четлатилиши Ренато Мойкано учун чемпионлик камари учун курашиш имкониятини яратиб берди.

«Мойкано чемпионлик камари учун бормоқда! Ислам Махачев, тайёр тур! Эртага менинг куним бўлади. Кутилмаган бу имконият тақдим этилганидан ўзимда йўқ хурсандман. Мен бежизга беш раундлик жангларга чапақай усулдаги жангчилар билан тайёргарлик кўрмаган эканман. Астойдил меҳнат қилаётгандим. Қачонлардир чемпионлик имконияти берилишини кутиб яшаётгандим. Эртага дунёни ларзага соламан. Мен жаҳон чемпиони бўламан. Бунга ваъда бераман. Кетдик!» деди Бразилиялик спортчи ўз интервьюсида.

UFC босслари Царукяннинг жангдан четлатилишидан сўнг марказий жангни сақлаб қолиш учун Ренато Мойканони Исламга рақиб сифатида тайинлашди. Мойкано аслида Бенил Дариушга қарши жанг ўтказиши керак эди. Шу вазиятга муносабат билдирган UFC раҳбари Дана Уайт ҳар қандай вазиятда ҳам мухлислар учун энг яхши жангларни ташкил қилишга интилишини, Махачев ва Мойкано ўртасидаги жанг мухлисларга ёқишига ишонишини билдирган.

Эслатиб ўтамиз, «UFC 311» турнирида ўзбекистонлик аралаш яккакураш устаси Богдан Гусков ҳам иштирок этади. Бу унинг UFC остидаги навбатдаги муҳим жанги бўлади. Гусков мухлислар ишончини оқлаш ниятида эканлигини маълум қилиб шундай деди: «Ҳар бир жанг — бу мен учун янги қадам ва янги имконият. Мухлислар ишончини оқлаш учун астойдил ҳаракат қиламан». Аввалроқ, ушбу турнирда Богдан Гусков билан жанг қилиши керак бўлган америкалик Жонни Уокер ҳам машғулотда орттирган жарохати сабаб жангдан чиққан эди.

UFC Тез фурсатда ҳамюртимиз учун янги рақиб топган ва жанг ўз кучида қолган. Ҳамюртимиз 19 январ кунги жанг оқшомида америкалик Билли Элекана билан жанг қилади.

«UFC 311» турнирининг марказий жанги мухлислар учун ёрқин тўқнашув бўлиши кутилмоқда. Ислам Махачев ўз чемпионлик мақомини сақлаб қолиш учун курашади, Ренато Мойкано эса уни қўлга киритишга интилмоқда. Турнир мухлислар учун ёдда қоларли бўлиши шубҳасиз.