Иллюстратив фото

Венгрия бош вазири Виктор Орбаннинг кортежи Германиянинг Штутгард шаҳрида йўл транспорт ҳодисасига учради. Бу ҳақда AP ахборот агентлиги хабар берди.

Маълум бўлишича, Виктор Орбанни кузатиб бораётган махсус автомобиль мототцикл билан тўқнашиб кетган. Оқибатда бир нафар полициячи ҳалок бўлди. Воқеа бош вазирнинг футбол ўйинига ташриф буюриб, Штутгарт аэропортига кетаётганида содир бўлган.

Тўқнашув кузатувчи автомобиль чапга бурилишга уриниб, мототциклдаги полициячини уриб юборганида содир бўлган. «Бир офицер олган жароҳатлари туфайли вафот этди, иккинчиси эса оғир жароҳат олган» дейилади хабарда.

Штутгарт полицияси автомобиль ҳайдовчиси ёпиқ чорраҳани кўрмаганини, бу эса ҳалокатга олиб келганини маълум қилган. Шаҳар прокуратураси вазиятни ўрганмоқда.

Европада ҳукумат раҳбарлари билан кўнгилсиз ҳолатлар кўп учрамоқда. Аввалроқ, Дания бош вазири Метте Фредериксен Копенгаген марказий кўчаларидан бирида номаълум эркак ҳужумига учраган эди.

Венгрия Бош вазири Виктор Орбан турли ҳаракатлар ва баёнотлар орқали Россияга ён босишда гумонланиб келинади. Унинг Владимир Путин билан яқин муносабатда эканлиги ҳам маълум. Венгрия бош вазири, шунингдек, Европа Иттифоқининг Россияга қарши санкцияларини кескин танқид қилиб, улар Венгрия иқтисодиётига зарар етказади, деб ҳисоблашини тез-тез такрорлаб туриши билан машҳур.

Бундан ташқари, у энергетика соҳасидаги Россия манфаатларини қўллаб-қувватлаб, Москва билан муҳим энергетика битимларига эришганди. Жумладан, Россия гази бўйича йирик шартнома ва Россия ёрдами билан Венгрия атом электр станциясини кенгайтириш кабилар шулар қаторига киради.