Пойтахтнинг Шота Руставели кўчасидан ўтувчи навбатдаги 3 та автобус йўналиши ҳаракати қайта тикланмоқда. Бу ҳақда Тошкент шаҳар транспорт ва йўл-транспорт инфратузилмасини ривожлантириш бош бошқармаси хабар берди.

Маълум қилинишича, жорий йилнинг 26 октябрь кунидан бошлаб 80-, 114- ва 127-сонли автобус йўналишлари Шота Руставели кўчасидаги марказий автобус йўлаги (BRT) орқали ҳаракатни бошлайди.

«Ушбу йўлак орқали ҳаракатланаётган автобусларга устуворлик бериш лозим.

Лойиҳа мақсади — жамоат транспортига устуворлик бериш, тирбандликларни камайтириш ва йўловчилар учун қулай ҳамда хавфсиз шароит яратишдир», дейилади Транспорт бошқармаси хабарида.

Бошқарма, шунингдек, қуйидагиларни эслатиб ўтган:

Йўловчилар учун:

• Автобуслар йўлнинг ўрта қисмидаги махсус ажратилган йўлак орқали ҳаракатланади.

• Платформага фақат белгиланган пиёдалар ўтиш жойлари орқали чиқинг.

• Автобус тўлиқ тўхтагачгина эшикка яқинлашинг.

• Аввал кексалар, ногиронлиги бўлган шахслар ва болали йўловчиларга йўл беринг.

Ҳайдовчилар учун:

• Марказий автобус йўлаги (BRT) фақат автобуслар учун мўлжалланган.

• Бу йўлакда бошқа транспорт воситаларининг ҳаракатланиши ва тўхташи қатъиян тақиқланади.

• Чапга бурилиш ва ортга қайрилиш ҳар икки йўналишда ҳам тақиқланган.

Эслатиб ўтамиз, жорий йилнинг 22 октябрь кунидан бошлаб 2-, 18-, 45- ва 94-сонли автобус йўналишлари Шота Руставели кўчасидаги марказий автобус йўлаги (BRT) орқали ҳаракатлана бошлаган эди.