Toshkentda yana 3 ta avtobus yoʻnalishi BRT orqali harakatni boshlaydi

17:39 24 Oktyabr 2025 Jamiyat
340 0

Poytaxtning Shota Rustaveli koʻchasidan oʻtuvchi navbatdagi 3 ta avtobus yoʻnalishi harakati qayta tiklanmoqda. Bu haqda Toshkent shahar transport va yoʻl-transport infratuzilmasini rivojlantirish bosh boshqarmasi xabar berdi.

Maʼlum qilinishicha, joriy yilning 26-oktyabr kunidan boshlab 80-, 114- va 127-sonli avtobus yoʻnalishlari Shota Rustaveli koʻchasidagi markaziy avtobus yoʻlagi (BRT) orqali harakatni boshlaydi.

“Ushbu yoʻlak orqali harakatlanayotgan avtobuslarga ustuvorlik berish lozim.

Loyiha maqsadi — jamoat transportiga ustuvorlik berish, tirbandliklarni kamaytirish va yoʻlovchilar uchun qulay hamda xavfsiz sharoit yaratishdir”, deyiladi Transport boshqarmasi xabarida.

Boshqarma, shuningdek, quyidagilarni eslatib oʻtgan:

Yoʻlovchilar uchun:

• Avtobuslar yoʻlning oʻrta qismidagi maxsus ajratilgan yoʻlak orqali harakatlanadi.

• Platformaga faqat belgilangan piyodalar oʻtish joylari orqali chiqing.

• Avtobus toʻliq toʻxtagachgina eshikka yaqinlashing.

• Avval keksalar, nogironligi boʻlgan shaxslar va bolali yoʻlovchilarga yoʻl bering.

Haydovchilar uchun:

• Markaziy avtobus yoʻlagi (BRT) faqat avtobuslar uchun moʻljallangan.

• Bu yoʻlakda boshqa transport vositalarining harakatlanishi va toʻxtashi qatʼiyan taqiqlanadi.

• Chapga burilish va ortga qayrilish har ikki yoʻnalishda ham taqiqlangan.

Eslatib oʻtamiz, joriy yilning 22-oktyabr kunidan boshlab 2-, 18-, 45- va 94-sonli avtobus yoʻnalishlari Shota Rustaveli koʻchasidagi markaziy avtobus yoʻlagi (BRT) orqali harakatlana boshlagan edi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?