Foto: Yunus Boʻriyev/“Xalq soʻzi”

Namangan bugun yangilanish, goʻzallik va bunyodkorlik timsoliga aylangan. Har bir koʻchasi, har bir maskani zamonaviylik bilan milliy qadriyatlarning uygʻunlashgan manzarasini eslatadi. Ayniqsa, soʻnggi yillarda shahar qiyofasiga yangicha ruh baxsh etgan bunyodkorlik ishlari — Afsona vodiysi, zamonaviy turar joy majmualari, shuningdek, milliy uslubda barpo etilgan Yusufxon oʻgʻli Qosimxon jome masjidi — Namangan fayzini yanada oshirmoqda.

Afsona vodiysi – goʻyo bir ertak olamiga kirgandek his uygʻotadi. Bu maskan nafaqat dam olish, balki koʻrgan har bir kishining qalbida faxr va ilhom tuygʻusini uygʻotadi. Bahor faslida yam-yashil daraxtlar, yozda esa charaqlab turgan favvoralar vodiyni yanada jozibador qiladi.

Namanganning yangi turar joy majmualari esa zamonaviy arxitektura bilan milliy bezaklarni oʻzida mujassam etgan. Yangi bino va xiyobonlar shahar koʻrkini ochib, unda yashayotgan insonlarga qulaylik va quvonch baxsh etmoqda.

Tunda esa Namangan butunlay boshqacha — nurli, sokin va orzular bilan toʻla shahar koʻrinishiga kiradi. Chiroqlar jilosi, yoʻllardagi tartib, xiyobonlarda kezib yurgan odamlarning yuzidagi mamnunlik — bularning barchasi Namangan kechasini sehrli manzaraga aylantiradi.

Bugungi Namangan – mehnatsevar xalqining bunyodkorligi, goʻzallikka intilishi va Vatan mehrining yorqin ifodasidir. Har bir yangi qurilish, har bir koʻkatzor va har bir chiroq shu diyorning yorqin kelajagiga ishonch ramzidir.