Фото: Юнус Бўриев/«Халқ сўзи»

Наманган бугун янгиланиш, гўзаллик ва бунёдкорлик тимсолига айланган. Ҳар бир кўчаси, ҳар бир маскани замонавийлик билан миллий қадриятларнинг уйғунлашган манзарасини эслатади. Айниқса, сўнгги йилларда шаҳар қиёфасига янгича руҳ бахш этган бунёдкорлик ишлари — Афсона водийси, замонавий турар жой мажмуалари, шунингдек, миллий услубда барпо этилган Юсуфхон ўғли Қосимхон жоме масжиди — Наманган файзини янада оширмоқда.

Афсона водийси – гўё бир эртак оламига киргандек ҳис уйғотади. Бу маскан нафақат дам олиш, балки кўрган ҳар бир кишининг қалбида фахр ва илҳом туйғусини уйғотади. Баҳор фаслида ям-яшил дарахтлар, ёзда эса чарақлаб турган фавворалар водийни янада жозибадор қилади.

Наманганнинг янги турар жой мажмуалари эса замонавий архитектура билан миллий безакларни ўзида мужассам этган. Янги бино ва хиёбонлар шаҳар кўркини очиб, унда яшаётган инсонларга қулайлик ва қувонч бахш этмоқда.

Тунда эса Наманган бутунлай бошқача — нурли, сокин ва орзулар билан тўла шаҳар кўринишига киради. Чироқлар жилоси, йўллардаги тартиб, хиёбонларда кезиб юрган одамларнинг юзидаги мамнунлик — буларнинг барчаси Наманган кечасини сеҳрли манзарага айлантиради.

Бугунги Наманган – меҳнацевар халқининг бунёдкорлиги, гўзалликка интилиши ва Ватан меҳрининг ёрқин ифодасидир. Ҳар бир янги қурилиш, ҳар бир кўкатзор ва ҳар бир чироқ шу диёрнинг ёрқин келажагига ишонч рамзидир.