Фото: Reuters

НАТО Бош котиби Йенс Столтенберг Финляндия ва Швециянинг иттифоққа қўшилиш шартларини муҳокама қилиш учун 16 февраль куни Туркияга боришини айтди.

Унга кўра, бу давлатлар Туркиянинг барча шартларини бажарган ва кузгача НАТОга аъзо бўлиши керак.

Эслатиб ўтамиз, аввалроқ Туркия президенти Режеп Таййип Эрдоған Стокголмдаги Туркия элчихонаси яқинида Ислом динининг муқаддас китоби — Қуръон ёқиб юборилиши билан боғлиқ воқеадан сўнг Швеция НАТОга аъзолик масаласида Туркия ёрдамига умид қила олмаслигини айтган эди.

«Швециядаги, ҳаттоки дипломатик ваколатхонамиз яқинидаги бу нопок ҳаракатлар мусулмонлар, умуман, барча инсонлар, барча ҳуқуқ ва эркинликларни ҳақорат қилиш ҳисобланади», деган эди Туркия президенти.

Унинг сўзларига кўра, Швеция Шимолий Атлантика альянсига киришда энди ёрдам кутмаслиги керак, чунки мамлакат террорчиларни қўллаб-қувватлашда давом этмоқда.

Шу йилнинг 21 январь куни Даниянинг Ислом динига қарши «Stram Kurs» партияси раҳбари Расмус Палудан Туркиянинг Стокголмдаги элчихонаси олдида Қуръонни ёқиб юборди.

Акция шаҳар маъмурияти билан келишилган ва Палудан бундай чиқиш учун тўловни амалга оширган. Бундан ташқари, Стокголм маъмурияти маҳаллий курдларга ҳам намойиш ўтказишга рухсат берган ва унда 50 га яқин одам йиғилган.

Акция ташкилотчисининг сўзларига кўра, у Туркия Швециянинг НАТОга киришига тўсқинлик қилаётганига норозилик сифатида мусулмонларнинг муқаддас китобини ёқиб юборган. Аввалроқ Стокголмда Туркия президенти Режеп Таййип Эрдоғаннинг ҳайкали ёқиб юборилган акция ўтказилганди.

Ўз навбатида, Финляндиянинг "Iltalehti" газетаси, агар Туркия ёки Венгрия фақат Финляндия аризасини ратификация қилса, у ҳолда Финляндия Швециясиз ҳам НАТОга киришга тайёрлигини ёзди.

Финляндия ва Швеция ўтган йилнинг февраль ойида НАТОга аъзо бўлиш учун ариза берган ва уларнинг аъзолик ҳақидаги аризалари Венгрия ва Туркиядан ташқари альянснинг барча аъзолари томонидан ратификация қилинган.