Фото: Культура.РФ

Ўзбекистон Фанлар академияси ҳақиқий аъзоси, физика-математика фанлари доктори, профессор Галина Павловна Матвиевская 95 ёшида Оренбург шаҳридаги уйида вафот этди. Бу ҳақда Фанлар академияси матбуот хизмати хабар берди.

Галина Матвиевская 1930 йилда Днепропетровск (ҳозир Украина Республикасининг Днепр шаҳри)да туғилган. 1954 йилда Ленинград (ҳозирги Санкт-Петербург) университетининг математика механика факультетини тамомлаган, 1959 йилда СССР Фанлар академияси (ҳозирги Табиатшунослик ва Россия техника Фанлар тарихи академияси)нинг институтида номзодлик диссертациясини ҳимоя қилган. Ўша йили у Ўзбекистон Фанлар академияси В. И. Романовский номидаги Математика институтига ўрта асрлар Шарқидаги фанлар тарихи бўйича тадқиқотларни кучайтириш учун таклиф қилинган. 1968 йилда у докторлик диссертациясини ҳимоя қилган (илмий маслаҳатчиси — академик С. Х. Сирожиддинов). У Борис Розенфелд билан биргаликда жаҳон фондларида сақланаётган араб тилидаги математика ва астрономияга оид қўлёзмалар каталогини тузган, шогирдлари билан биргаликда Ўзбекистон Фанлар академияси Абу Райҳон Беруний номидаги Шарқшунослик институтидаги математик қўлёзмаларининг тавсифини амалга оширган.

Матвиевская Муҳаммад ибн Мусо ал-Хоразмий, Абу Райҳон Беруний, Шамсиддин Самарқандий ва Мирзо Улуғбек, Самарқандда фаолият олиб борган Қозизода Румий, Жамшид Коший ва бошқа олимларининг илмий меросини ўрганиш ва тарғиб қилиш, шунингдек, илм-фан тарихи бўйича мутахассислар тайёрлашдаги хизматлари учун Беруний номидаги Ўзбекистон Давлат мукофоти (1974), «Ўзбекистон Республикасида хизмат кўрсатган фан арбоби» фахрий унвони (1980) билан тақдирланган. У Ўзбекистон Республикаси Фанлар академияси мухбир аъзоси (1984), сўнгра Ўзбекистон Республикаси Фанлар академиясининг ҳақиқий аъзоси (2000) этиб сайланган.

Олима лотин, инглиз, немис, француз ва араб тилларини билган. У ЮНEСКО томонидан табиий фанлар тарихи бўйича йирик мутахассис сифатида тан олинган ва Халқаро фанлар тарихи академиясининг (Париж) ҳақиқий аъзоси этиб сайланган. Матвиевская ал Хоразмий, Декарт, Беруний, Улуғбек, В. И. Романовский, Абдурраҳмон ас-Сўфий ҳақида китоблар нашр эттирган, шарқшунослик соҳасига илмий тўпламлар тузувчиси ва бош муҳаррири бўлган. Шунингдек, Муҳаммад ибн Мусо ал-Хоразмийнинг 1200 йиллиги муносабати билан ташкил этилган юбилей (1983) тадбирларини ўтказишда фаол иштирок этган.

«Ўзбекистонда шарқшунослик фанининг ривожига улкан ҳисса қўшган атоқли олим Галина Павловна Матвиевскаянинг ёрқин хотираси қалбимизда ҳамиша сақланиб қолади. Ўзбекистон Фанлар академияси жамоаси номидан марҳумнинг оила аъзолари ва яқинларига чуқур ҳамдардлик билдирамиз», дейилади ЎзР ФАнинг таъзия хабарида.