Франциянинг собиқ президенти Никола Саркози Париждаги уйидан чиқиб, «Санте» қамоқхонасига йўл олди. «Коммерсант» нашрининг ёзишича, у бугундан бошлаб сайлов кампаниясини ноқонуний молиялаш билан боғлиқ жиноят иши бўйича тайинланган беш йиллик қамоқ жазосини ўташни бошлайди.

Жаноб Саркози уйидан турмуш ўртоғи Карла Бруни билан бирга чиққан. Уни кўчаларда йиғилган тарафдорлари «Никола! Никола!» дея олқишлаб кутиб олган. Орадан кўп ўтмай, собиқ президентни олиб кетаётган кортеж қамоқхона биносига етиб келган.

ТАСС агентлигининг хабар беришича, Саркози аллақачон қамоқхонага жойлаштирилган. Нашр маълумотига кўра, у турган машина қамоқхона ҳудудига кирган, собиқ президентга адвокатлари ҳамроҳлик қилган.

Никола Саркози 2007–2012 йиллар давомида Франция президенти лавозимида ишлаган. Унга нисбатан жиноят иши 2013 йилда, Ливия ҳукумати томонидан унинг сайлов кампанияси ноқонуний молиялаштирилганлиги гумони билан очилган.

Ўтган сентябрь ойида суд Саркозини беш йилга озодликдан маҳрум этди. Собиқ президент жазони «заиф тоифадаги маҳбуслар» учун мўлжалланган махсус бўлимдаги якка хонада ўтайди.