Fransiyaning sobiq prezidenti Nikola Sarkozi Parijdagi uyidan chiqib, “Sante” qamoqxonasiga yoʻl oldi. “Kommersant” nashrining yozishicha, u bugundan boshlab saylov kampaniyasini noqonuniy moliyalash bilan bogʻliq jinoyat ishi boʻyicha tayinlangan besh yillik qamoq jazosini oʻtashni boshlaydi.

Janob Sarkozi uyidan turmush oʻrtogʻi Karla Bruni bilan birga chiqqan. Uni koʻchalarda yigʻilgan tarafdorlari “Nikola! Nikola!” deya olqishlab kutib olgan. Oradan koʻp oʻtmay, sobiq prezidentni olib ketayotgan kortej qamoqxona binosiga yetib kelgan.

TASS agentligining xabar berishicha, Sarkozi allaqachon qamoqxonaga joylashtirilgan. Nashr maʼlumotiga koʻra, u turgan mashina qamoqxona hududiga kirgan, sobiq prezidentga advokatlari hamrohlik qilgan.

Nikola Sarkozi 2007–2012-yillar davomida Fransiya prezidenti lavozimida ishlagan. Unga nisbatan jinoyat ishi 2013-yilda, Liviya hukumati tomonidan uning saylov kampaniyasi noqonuniy moliyalashtirilganligi gumoni bilan ochilgan.

Oʻtgan sentyabr oyida sud Sarkozini besh yilga ozodlikdan mahrum etdi. Sobiq prezident jazoni “zaif toifadagi mahbuslar” uchun moʻljallangan maxsus boʻlimdagi yakka xonada oʻtaydi.