Фото: Бошқарув самарадорлиги агентлиги

Бошқарув самарадорлиги агентлиги БМТ Озиқ-овқат ва қишлоқ хўжалиги ташкилоти (FAO)нинг Ўзбекистондаги ваколатхонаси билан ҳамкорлик ўрнатди. Бу ҳақда агентлик матбуот хизмати хабар берди.

Маълум қилинишича, бугун, 27 октябрь куни Президент ҳузуридаги Бошқарув самарадорлиги агентлиги раҳбари Улуғбек Хусаинов ҳамда БМТ Озиқ-овқат ва қишлоқ хўжалиги ташкилоти (FAO)нинг Ўзбекистондаги вакили ўринбосари Шерзод Умаров учрашуви ташкил этилган.

Учрашувда давлат хизматида бошқарув самарадорлиги ва натижадорлигини ошириш, давлат хизматчилари салоҳиятини ошириш, кенг қамровли дастурлар орқали соҳага инновацияларни жорий қилиш бўйича ҳамкорлик истиқболлари муҳокама қилинган.

Шунингдек, Бошқарув самарадорлиги агентлиги ва FAO 'нинг Ўзбекистондаги ваколатхонаси ўртасида ўзаро англашув меморандуми имзоланган.

Меморандум доирасида:

• давлат ҳокимияти ва бошқаруви органларида гендер тенглиги, шу жумладан, аёлларнинг қишлоқ жойларда давлат бошқарув органларида фаолиятини кенгайтириш мақсадида семинар, тренинг, мастер-класс, стажировка дастурларини амалга ошириш;

• FAO тизимида ёш мутахассисларни тайёрлаш ва малакасини ошириш амалиётини жорий этиш ҳамда мунтазам равишда хорижий стажировкаларга юборишни ташкил этиш;

• вилоят ва туманларнинг қишлоқ ва сув хўжалиги бўйича ҳоким ўринбосарлари учун давлат хизматини такомиллаштириш, қишлоқларни ривожлантириш, қишлоқ ва сув хўжалигини бошқариш бўйича махсус малака ошириш ўқув дастурларини ташкил этиш;

• хорижий ва маҳаллий экспертларни жалб этган ҳолда онлайн ўқув курслари ва модулларини ишлаб чиқиш ва махсус платформада жойлаштириб бориш каби ҳамкорлик йўналишлари белгилаб олинган.