Сайлов участкалари овоз бериш учун тайёргарлик жараёнлари якунланди

02:00 23 Октябр 2021 Жамият
432 0

Фото: Ҳасан Пайдоев / "Халқ сўзи"

Эртага мамлакатимиз ҳаётида муҳим сиёсий воқеа — Ўзбекистон Республикаси Президенти сайлови бўлиб ўтади. Сайлов кампанияси даврида ушбу тадбирга пухта ҳозирлик кўрилди.

Президент сайловини ўтказиш учун ташкил этилган 14 та сайлов округи ва 10 минг 760 та сайлов участкаси сайловчилар ўз хоҳиш-иродаларини эмин-эркин билдириши, конституциявий ҳуқуқларидан тўлақонли фойдаланишлари учун шай ҳолатга келтирилди.

Пойтахтимиздаги Ўзбекистон Республикаси Президенти сайловини ўтказувчи 105-сайлов участкаси ҳам сайловни очиқлик, тенглик ва халқаро демократик тамойилларга мувофиқ ўтказиш учун ҳозирланди. У замонавий ахборот-коммуникация технологиялари, зарур адабиёт ҳамда қўлланмалар билан тўлиқ таъминланди, овоз бериш кабиналари ва қутилари тайёр қилиб қўйилди. Она ва бола, тиббиёт хоналари замонавий жиҳозланган.

Ҳасан Пайдоев / "Халқ сўзи"

— Сайловга тайёргарлик ишлари тасдиқланган режа асосида олиб борилди, — дейди 105-участка сайлов комиссияси раиси Яйра Мирзаҳмадий. — Сайлов участкамизда 2 минг 207 нафар сайловчи рўйхатга олинган бўлиб, улардан 13 нафари биринчи марта овоз берадиган ёшлардир. Шунингдек, ҳудудда соғлиғи ёки кексалиги боис сайлов участкасига келолмайдиган 68 нафар фуқаро рўйхатга олинган. Уларга уй шароитида овоз бериш имконияти яратилади. Шунингдек, жисмоний имконияти чекланган сайловчиларнинг бинога кириши ва чиқиши учун алоҳида йўлак, овоз бериши учун ҳам махсус жойлар ҳозирланди.

Яна бир муҳим жиҳат, Марказий сайлов комиссияси маълумотларига кўра, ҳозирда хорижда яшаётган сайловчиларнинг сайлов ҳуқуқларини таъминлашга алоҳида эътибор қаратилган. Шу мақсадда хориждаги элчихоналар ва консуллик идоралари ҳузурида 37 та давлатда 54 та сайлов участкаси, 149 та шаҳарда 380 та қўшимча кўчма сайлов участкаси, шу жумладан, дипломатик ваколатхоналар бўлмаган 11 та давлатда ҳам ташкил этилди.

Ҳасан Пайдоев / "Халқ сўзи"

Аккредитациядан ўтган халқаро кузатувчилар сони 969 нафар бўлиб, шундан 629 таси халқаро ташкилотдан, 340 таси хорижий давлатлардандир. Аккредитациядан ўтган жами 1 минг 672 та (1 минг 439 та миллий ва 233 та хорижий) оммавий ахборот воситалари вакиллари ҳам бу муҳим тадбирда ўз ҳиссасини қўшади.

Умуман, мамлакатимиздаги барча сайлов участкаси фуқароларнинг ўз конституциявий ҳуқуқларини рўёбга чиқариши, эмин-эркин овоз беришлари учун тайёр ҳолга келтирилди.

Раҳим ШEРҚУЛОВ, «Халқ сўзи».

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?