Saylov uchastkalari ovoz berish uchun tayyorgarlikjarayonlari yakunlandi

02:00 23 Oktyabr 2021 Jamiyat
433 0

Ertaga mamlakatimiz hayotida muhim siyosiy voqea — Oʻzbekiston Respublikasi Prezidenti saylovi boʻlib oʻtadi. Saylov kampaniyasi davrida ushbu tadbirga puxta hozirlik koʻrildi.

Prezident saylovini oʻtkazish uchun tashkil etilgan 14 ta saylov okrugi va 10 ming 760 ta saylov uchastkasi saylovchilar oʻz xohish-irodalarini emin-erkin bildirishi, konstitutsiyaviy huquqlaridan toʻlaqonli foydalanishlari uchun shay holatga keltirildi.

Poytaxtimizdagi Oʻzbekiston Respublikasi Prezidenti saylovini oʻtkazuvchi 105-saylov uchastkasi ham saylovni ochiqlik, tenglik va xalqaro demokratik tamoyillarga muvofiq oʻtkazish uchun hozirlandi. U zamonaviy axborot-kommunikatsiya texnologiyalari, zarur adabiyot hamda qoʻllanmalar bilan toʻliq taʼminlandi, ovoz berish kabinalari va qutilari tayyor qilib qoʻyildi. Ona va bola, tibbiyot xonalari zamonaviy jihozlangan.

Hasan Paydoyev / "Xalq so`zi" 

— Saylovga tayyorgarlik ishlari tasdiqlangan reja asosida olib borildi, — deydi 105-uchastka saylov komissiyasi raisi Yayra Mirzahmadiy. — Saylov uchastkamizda 2 ming 207 nafar saylovchi roʻyxatga olingan boʻlib, ulardan 13 nafari birinchi marta ovoz beradigan yoshlardir. Shuningdek, hududda sogʻligʻi yoki keksaligi bois saylov uchastkasiga kelolmaydigan 68 nafar fuqaro roʻyxatga olingan. Ularga uy sharoitida ovoz berish imkoniyati yaratiladi. Shuningdek, jismoniy imkoniyati cheklangan saylovchilarning binoga kirishi va chiqishi uchun alohida yoʻlak, ovoz berishi uchun ham maxsus joylar hozirlandi.

Yana bir muhim jihat, Markaziy saylov komissiyasi maʼlumotlariga koʻra, hozirda xorijda yashayotgan saylovchilarning saylov huquqlarini taʼminlashga alohida eʼtibor qaratilgan. Shu maqsadda xorijdagi elchixonalar va konsullik idoralari huzurida 37 ta davlatda 54 ta saylov uchastkasi, 149 ta shaharda 380 ta qoʻshimcha koʻchma saylov uchastkasi, shu jumladan, diplomatik vakolatxonalar boʻlmagan 11 ta davlatda ham tashkil etildi.

Hasan Paydoyev / “Xalq soʻzi”

Akkreditatsiyadan oʻtgan xalqaro kuzatuvchilar soni 969 nafar boʻlib, shundan 629 tasi xalqaro tashkilotdan, 340 tasi xorijiy davlatlardandir. Akkreditatsiyadan oʻtgan jami 1 ming 672 ta (1 ming 439 ta milliy va 233 ta xorijiy) ommaviy axborot vositalari vakillari ham bu muhim tadbirda oʻz hissasini qoʻshadi.

Umuman, mamlakatimizdagi barcha saylov uchastkasi fuqarolarning oʻz konstitutsiyaviy huquqlarini roʻyobga chiqarishi, emin-erkin ovoz berishlari uchun tayyor holga keltirildi.

Rahim SHERQULOV, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?