Дубай шаҳрида ўтаётган V ёшлар Пара Осиё ўйинлари инсон иродаси, матонати қандай юксак натижалар беришини намоён этмоқда. Ушбу нуфузли мусобақада ўзбекистонлик ёш спортчилар бу мусобақада маҳорат ва жасорат билан юртимиз нуфузини янада юксалтирмоқда.

Жумладан, мусобақанинг пара пауэрлифтинг дастурида совринли ўринлар учун кураш олиб борган Рухшона Ўктамова (-67 кг) 120 килограмм оғирликни бўйсундириб нафақат олтин медални қўлга киритди, балки янги жаҳон рекордини ҳам ўрнатди.

“Юртдошларимизнинг ишончи ва Она Ватанимиз шуҳрати учун шунчаки штанга кўтармадим, Ватан байроғини баланд кўтардим”, — деди Рухшона ғалабадан кейин.

-73 кг вазн тоифасида беллашган яна бир ҳамюртимиз Гулюз Неъматуллаева 105 кг натижа билан олтин медалга сазовор бўлди.

-67 кг вазн тоифасида иштирок этган Дилнаво Абдуманнопова эса бронза медални қўлга киритди.

Қизларнинг юксак натижаси нафақат спорт майдонидаги зафар, балки ҳар бир ёшга куч, матонат ва орзулар йўлида қатъият билан ҳаракат қилиш йўлида намунадир. Қолаверса, бу ғалабалар юртимизда спортга бўлган эътибор, ёшларни қўллаб-қувватлаш қаратилаётган ишларининг натижаси ҳамдир.

Улуғбек РЎЗИМАТОВ, “Халқ сўзи”.