Silk Road Samarkand sayyohlik markazi va Rocket DMC Uzbekistan turistik kompaniyasi shu kunlarda Londonda 6-8-noyabr kunlari boʻlib oʻtayotgan World Travel Market koʻrgazmasi doirasida Oʻzbekistonni namoyish etmoqda.

Oʻzbekiston stendida koʻrgazma mehmonlari va ishtirokchilariga yurtimizning barqaror rivojlanayotgan turizm sohasining keng imkoniyatlari haqida soʻzlab beriladi. Birinchi kuni stendga 500 dan ortiq odam tashrif buyurdi. Ayniqsa, dunyoning yirik sayyohlik kompaniyalari, shuningdek, bir qator materiallarni chiqarish maqsadida Silk Road Samarkand majmuasiga tashrif buyurish istagini bildirgan jurnalist va blogerlar qiziqish bildirmoqda.

World Travel Market (WTM) dunyodagi sayohat va turizm sohasidagi eng nufuzli tadbirdir. Koʻrgazma xalqaro sayyohlar hamjamiyatini birlashtiradi. Ushbu koʻrgazma, turizm sohasidagi mutaxassislarni tayyorlash, qidirish va qiyosiy tahlil qilishni taʼminlaydi va butun dunyodagi eksponentlarga oʻzlarining turizm koʻlamini xalqaro maydonda namoyish etish uchun imkoniyati yaratadi.

Eslatib oʻtamiz, avvalroq Buyuk Britaniyadagi nufuzli “World Travel Market London – 2023” koʻrgazmasida Oʻzbekiston milliy pavilyoni tashkil etildi.