Фото: Reuters

Жанубий Корея бош вазири Хан Доксу кўплаб истеъфолар ва президентнинг истеъфога чиқишига чақириқлар кучайиб бораётганидан кейин халққа «охиригача» хизмат қилишга ваъда берди.

«Мен Вазирлар Маҳкамасини назорат қилувчи Бош вазир сифатида ҳозиргача бўлган барча воқеалар учун тўлиқ жавобгарликни ўз зиммамга оламан. Шу пайтдан бошлаб Вазирлар Маҳкамаси мамлакат барқарорлиги ва одамларнинг кундалик ҳаётига таъсир қилмаслигини таъминлаш бўйича ўз вазифаларини бажариши керак», — деди Хан чоршанба куни мурожаатида.

Олтита мухолифат партияси президент Юн Сок Ёлнинг қисқа муддатли ҳарбий ҳолат тўғрисидаги фармонига сиёсий доирада, шу жумладан, ўз партияси ичида ҳам кенг тарқалган норозиликдан сўнг импичмент эълон қилишга киришди.

“Yonhap” ахборот агентлиги хабарига кўра, президентнинг импичментини талаб қилувчи қонун лойиҳаси мамлакат қонун чиқарувчи органи бўлмиш Миллий ассамблеяга тақдим этилди, овоз бериш жума ёки шанба кунига белгиланган. Агар у қабул қилинса, Конституциявий судга юборилади ва у ерда камида олти судя импичментни қўллаб-қувватлашга рози бўлиши керак.

Жанубий Корея конституциясига кўра, президент импичмент эълон қилинмагунча суд жараёнида ўз ваколатларини амалга ошириши тўхтатилади. Бош вазир муваққат раҳбар лавозимини эгаллайди. Маълумотларга кўра, Ёлнинг маъмурияти раҳбари ва президентнинг 10 дан ортиқ юқори лавозимли котиблари истеъфога чиқиш ҳақида ариза берган.