Ўзбекистонлик шахматчи Нодирбек Якуббоев ҳиндистонлик рақибаси Рамешбабу Ваишали билан ўйин олдидан қўл бериб кўришмагани учун унинг олдига бориб узр сўради. Бу ҳақда спортчи ўзининг «Х» тармоғидаги саҳифасида маълум қилган.

Ҳиндистонлик шахматчи спортчимиз ўзининг қарашлари ҳақида Қатардаги ўйинларда ҳам унга айтганини, вазиятни тўғри қабул қилгани ва Нодирбек ўзини бу учун ёмон ҳис қилиши шарт эмаслигини билдирди.

Маълумот учун, Нидерландияда бўлиб ўтган «Tata Steel Challengers» турнирида шахматчимиз ҳиндистонлик рақибаси Рамешбабу Ваишали билан диний эътиқоди сабабли қўл сиқишишдан бош тортганидан сўнг кўплаб танқид ва муҳокамалар остида қолди.

Шундан сўнг: «Вайшали билан ўйин олдидан юзага келган ҳолатга изоҳ бермоқчиман. Мен аёлларни ва ҳиндистонлик шахматчиларни чуқур ҳурмат қиламан, лекин диний принципларим туфайли аёллар билан қўл бериб кўришишдан қочаман. Мен Вайшали ва унинг акасини Ҳиндистоннинг ажойиб шахматчилари сифатида ҳурмат қиламан. Агар менинг хатти-ҳаракатим унда ёки бошқаларда салбий ҳис-туйғуларни келтириб чиқарган бўлса, узр сўрайман», деганди Нодирбек ўзининг «Х» саҳифасида.