Foto: Reuters

Janubiy Koreya bosh vaziri Xan Doksu koʻplab isteʼfolar va prezidentning isteʼfoga chiqishiga chaqiriqlar kuchayib borayotganidan keyin xalqqa “oxirigacha” xizmat qilishga vaʼda berdi.

“Men Vazirlar Mahkamasini nazorat qiluvchi Bosh vazir sifatida hozirgacha boʻlgan barcha voqealar uchun toʻliq javobgarlikni oʻz zimmamga olaman. Shu paytdan boshlab Vazirlar Mahkamasi mamlakat barqarorligi va odamlarning kundalik hayotiga taʼsir qilmasligini taʼminlash boʻyicha oʻz vazifalarini bajarishi kerak”, — dedi Xan chorshanba kuni murojaatida.

Oltita muxolifat partiyasi prezident Yun Sok Yolning qisqa muddatli harbiy holat toʻgʻrisidagi farmoniga siyosiy doirada, shu jumladan, oʻz partiyasi ichida ham keng tarqalgan norozilikdan soʻng impichment eʼlon qilishga kirishdi.

“Yonhap” axborot agentligi xabariga koʻra, prezidentning impichmentini talab qiluvchi qonun loyihasi mamlakat qonun chiqaruvchi organi boʻlmish Milliy assambleyaga taqdim etildi, ovoz berish juma yoki shanba kuniga belgilangan. Agar u qabul qilinsa, Konstitutsiyaviy sudga yuboriladi va u yerda kamida olti sudya impichmentni qoʻllab-quvvatlashga rozi boʻlishi kerak.

Janubiy Koreya konstitutsiyasiga koʻra, prezident impichment eʼlon qilinmaguncha sud jarayonida oʻz vakolatlarini amalga oshirishi toʻxtatiladi. Bosh vazir muvaqqat rahbar lavozimini egallaydi. Maʼlumotlarga koʻra, Yolning maʼmuriyati rahbari va prezidentning 10 dan ortiq yuqori lavozimli kotiblari isteʼfoga chiqish haqida ariza bergan.