Фото: "Халқ сўзи"

Россия Федерациясига фуқароларни ташкиллаштирилган ва тартибли ишга юбориш бўйича Ўзбекистон Республикаси ва Россия Федерацияси ўртасида ҳукуматлараро “Пилот” лойиҳаси имзолангани барчага маълум. Мазкур  лойиҳа бўйича Ташқи меҳнат миграцияси агентлиги Наманган вилояти филиалида Россиянинг “Строй Крафт”, “Пик индустрия”, “Анастрой”, “ПСП” ва бошқа иш берувчилари томонидан  танлов жараёнлари ўтказилмоқда. Жорий йил якунига қадар лойиҳа асосида минг нафар наманганликни ҳамкор мамлакатга  ташкилий равишда ишга юбориш, уларнинг расмий бандлигини таъминлаш, ҳуқуқ ва манфаатларини кафолатлаш мақсад қилинган. Бунда иш берувчи томонидан фуқаролар кетиш харажатлари, иш жойига боргач, уч маҳал иссиқ овқат, махсус кийим бош, ётоқхона билан бепул таъминланиб, ойлик меҳнат ҳақи  касб мутахассислигига қараб ўртача 500-800 доллар миқдорида  тўланади.       

Кеча  навбатдаги юз нафар фуқаро   Амур ўлкасига ишга юборилди. Шу муносабат билан ташкил этилган тадбирда  Ташқи меҳнат миграцияси агентлиги, “Истиқболли авлод” нодавлат нотижорат ташкилоти, Маънавият ва маърифат маркази вилоят бўлими томонидан фуқароларга тушунтириш ва маслаҳатлар берилди.

                                                                 Қудратилла НАЖМИДДИНОВ, “Халқ сўзи”.