Фото: Ташқи ишлар вазирлиги

2022 йил 1 декабрь куни Лодз шаҳрида бўлиб ўтаётган ЙХҲТ Вазирлар кенгашининг 29-мажлиси доирасида Ўзбекистон Республикаси Ташқи ишлар вазири Владимир Норов Швеция Қироллиги Ташқи ишлар вазири Тобиас Биллстрём билан учрашди.

Суҳбат аввалида В.Норов Т.Биллстрёмни Швеция Ташқи ишлар вазири лавозимига тайинлангани билан табриклади.

Томонлар икки давлат ўртасидаги ўзаро манфаатли ҳамкорликни янада кенгайтириш учун биргаликдаги саъй-ҳаракатларни амалга оширишга тайёр эканликларини билдирдилар. Шу нуқтаи назардан, Ўзбекистон Президентининг Швецияда элчихона очиш тўғрисидаги қарори икки томонлама муносабатларни мустаҳкамлашда муҳим қадам экани алоҳида таъкидланди.

Бўлажак қўшма тадбирлар, жумладан, Ўзбекистон-Европа Иттифоқи шаклида ўтказиладиган тадбирлар жадвали юзасидан фикр алмашилди.

Таъкидланганидек, Ўзбекистон ва Швеция парламентлари ўртасидаги икки томонлама мулоқотни кенгайтириш томонлар учун муҳим аҳамиятга эга. Шу сабабдан парламент дипломатиясини ривожлантириш бўйича таклифлар кўриб чиқилди.

Савдо-иқтисодий ҳамкорликни кенгайтириш, хусусан, Швеция бозорига юқори сифатли ўзбек маҳсулотларини экспорт қилишни кўпайтириш, турли йўналишларда қўшма лойиҳаларни амалга ошириш учун соҳавий тузилмалари ўртасида яқин алоқаларни йўлга қўйиш бўйича чора-тадбирлар кўришга алоҳида эътибор қаратилди. .

Музокараларда, шунингдек, илмий-таълим соҳасидаги алоқаларни чуқурлаштириш ва икки томонлама муносабатларнинг шартномавий-ҳуқуқий базасини кенгайтириш масалалари муҳокама қилинди.