Фото: Абдулазиз Йўлдошев / Халқ сўзи

Самарқанд вилоятидаги “Ургут” эркин иқтисодий зонасидаги корхоналар томонидан шу йилнинг тўққиз ойида 1 триллион 332,3 миллиард сўмлик саноат товарлари ишлаб чиқарилиб, 41,9 миллион АҚШ долларлик кимё, озиқ-овқат ва тўқимачилик маҳсулотлари Хитой, Россия, Туркия, Тожикистон, Қирғизистон, Эрон каби давлатларга экспорт қилинди.

Ушбу ЭИЗда фаолият кўрсатиб келаётган “Сам Негин” корхонасида йилига 4-4,5 минг тонна иккиламчи полиэтилен идишларни қайта ишлаш эвазига импорт ўрнини босувчи 2 минг 400 метр квадрат нотўқима материаллар, 5 минг тонна конжугейт толаси, 4 минг 800 квадрат метр синтепон тайёрланмоқда. Жанубий Корея, Хитой ва Туркиядан келтирилган замонавий ускуналар ёрдамида республикамизнинг турли ҳудудларидан йиғиб келтирилган иккиламчи елим идишлар корхона цехларида сараланади, ювилиб, сўнгра зарур ҳароратда қуритилгач, эритилган ҳолда сунъий тола шаклига келтирилади. Тайёр толаларга техник ишлов берилганидан сўнг прессланади ҳамда керакли ўлчамда қадоқланади.

Шу тариқа аҳоли томонидан чиқиндига ташланган полиэтилен идишларни қайта ишлаш эвазига экспортбоп, саноат корхоналари учун ўта зарур бўлган тайёр хом ашё ишлаб чиқарилмоқда. Чарм-пойабзал, автомобиль саноати учун сув ва ҳаводек зарур бўлган ушбу хом ашёлар олдин четдан катта валюталар ҳисобига мамлакатимизга келтирилганини ҳисобга олсак, мазкур корхонанинг ўрни ва аҳамияти нечоғли муҳим экани аён бўлади.

– 2017 йили биз янги лойиҳамиз билан “Ургут эркин иқтисодий зонаси” иштирокчисига айландик ва корхона ташкил этиб, 245 та иш ўрнини яратдик, - дейди корхона раҳбари Абдурашид Турсунов. – Ҳозирда эса корхонамизда 530 нафар ишчи-ходим меҳнат қилади. Маҳсулотларимизнинг катта қисми эса экспортга чиқарилади. Бундан ташқари маҳаллий ишлаб чиқарувчилардан ҳам буюртмаларимиз бор. Йил охирига қадар яна иш ўринларини кўпайтиришни режалаштирганмиз.

Дастлаб фаолиятини ижарага жой олиб, 2-3 нафар ишчи билан бошлаган “Urgut sanoat servis” оилавий корхонасида ҳам бугунги кунга келиб элликка яқин киши бандлиги таъминланган. Бу ерда илғор технология ёрдамида “Urgutini” ва “USS” бренди остида болалар, ўсмирлар ва эркаклар учун 200 турдан ортиқ кўйлаклар ишлаб чиқарилмоқда. Ўтган йили корхонада 10,2 миллиард сўмлик маҳсулот тайёрланган ва 100 минг долларлик маҳсулот экспорт қилинган эди. Бу йил эса ишлаб чиқаришни 20 миллиард сўмга етказиш ва экспортни икки баробарга ошириш кўзда тутилган.

– Маҳсулотлар ассортиметини кўпайтириш ва сифатини ошириш мақсадида туркиялик дизайнерни жалб этдик, - дейди корхона бош директори Мажидхон Исломов. – Истиқболда оилавий корхонани кенгайтириш ва толани қайта ишлашдан тортиб тайёр маҳсулот ишлаб чиқаришгача бўлган яхлит тизимни йўлга қўйишни ният қилганмиз.

Абдулазиз Йўлдошев, “Халқ сўзи”.