Фото: AP

АҚШ Украинадаги можарони молиялаштиришни тўхтатиши керак. Худди шундай фикрларни АҚШ Вакиллар палатаси аъзоси Маржори Тейлор Грин айтди.

“Бизнинг чегараларимиз — бу АҚШ тарихидаги энг ёмон миллий хавфсизлик инқирозида. АҚШ чегаралари хавфсизлигини Украинадаги ютқазилган урушни молиялаштириш билан аралаштирмаслик керак”, — дейди конгрессмен.

Шу ўринда Грин Украина Америка Қўшма Штатларининг 51-штати эмаслигини таъкидлади ва мамлакат чегаралари хавфсизлиги ва Киевни кўп миллион долларлик молиялаштириш масаласини бирлаштиришни ўз ичига олган ҳар қандай таклифни америкаликларнинг юзига тарсаки, деб атади.

Аввалроқ, АҚШ Конгрессининг айрим аъзолари Украинага ёрдам кўрсатиш АҚШ президентлик сайловларигача қолдирилгани ҳақида фикр билдирган эди. Уларнинг фикрича, агар Киевга ёрдам пакетини Рождествога қадар келишиб бўлмаса, у 2024 йил ноябрида бўлиб ўтадиган президентлик сайловларига қолдирилиши мумкин.

Бунгача, НАТО бош котиби Йенс Столтенберг ташкилот Украинадаги жанговар ҳаракатларни кучайтиришга тайёр бўлиши кераклигини, шунинг учун Киевга ҳарбий юкларни етказиб беришни кучайтириш кераклигини айтганди.

Унинг сўзларига кўра, НАТО жанговар ҳаракатлар ва янги ҳаво ва ракета ҳужумларига тайёр бўлиши керак. Бу НАТОга аъзо давлатлар учун Киевга ёрдамни янада кучайтириш муҳимлигини англатади.