Фото: Telegram

Жорий йилининг 27-31 январь кунлари ДХХ ҳамда ИИВ тузилмалари томонидан мамлакат миқёсида «Антитеррор-тозалаш» кенг кўламли тадбирлари олиб борилди. Тадбир давомида оғир ва ўта оғир жиноятлар содир этишга мойил 418 нафар шахс аниқланди, деб хабар берилди Telegram'даги «Хавфсизлик» каналида.

Қайд этилишича, криминоген вазиятни барқарорлаштириш ва унга салбий таъсир кўрсатувчи шахс ва жиноий гуруҳларни аниқлаш мақсадида жами 946 та махсус тадбир ўтказилган.

Унга кўра, оғир ва ўта оғир жиноятлар содир этишга мойил, республикадаги криминоген вазиятга салбий таъсир кўрсатувчи 418 нафар шахслар аниқланиб, уларга нисбатан жиноят ишлари қўзғатилган.

Жиноят ишлари доирасида 169 нафар шахслар қамоққа олиниб, 42 та жиноий гуруҳлар фаолиятига чек қўйилган. 399 нафар шахслар маъмурий жавобгарликка тортилиб, уларнинг 270 нафари маъмурий қамоққа олинган. 109 нафар қидирувдаги шахслар ушланган.

536 нафар шахслар билан профилактик суҳбатлар ўтказилиб, 402 нафари расмий огоҳлантирилган.

Шунингдек, тадбирлар давомида ноқонуний муомаладан 80 та қурол ўқ-дорилари билан, 30 кг 337 гр гиёҳвандлик воситалари, 4 минг 521 дона кучли таъсир қилувчи дори воситалари, 186 дона тиғ, 22 дона бита ва 17 дона кастетлар олинди.