Фото: Reuters

НАТО Украинадаги жанговар ҳаракатларни кучайтиришга тайёр бўлиши керак, шунинг учун Киевга ҳарбий юкларни етказиб беришни кучайтириш керак. НАТО бош котиби Йенс Столтенберг ташкилотга аъзо давлатларнинг ташқи ишлар вазирлари йиғилишида шундай баёнот билан чиқди.

Унинг сўзларига кўра, альянс Украина ҳудудида шиддатли ҳарбий амалиётларни ва унга ҳаво зарбаларини кўрмоқда.

“Биз жанговар ҳаракатлар ва янги ҳаво ва ракета ҳужумларига тайёр бўлишимиз керак. Бу НАТОга аъзо давлатлар учун Киевга ёрдамни янада кучайтириш муҳимлигини англатади”, — деди Столтенберг.

Столтенберг, шунингдек, Украинанинг келажаги НАТОда эканлигини ва альянс етакчилари аллақачон мамлакатни таклиф қилишга қарор қилганини айтди. Бироқ бу қачон амалга ошишига аниқлик киритмади. Унга кўра, Украина Шимолий Атлантика иттифоқига аъзо бўлиш учун барча шартларни бажариши керак.

Аввалроқ, Украина ташқи ишлар вазири Дмитрий Кулеба Киев НАТОга қўшилиш учун қандай шартларни бажариши кераклигини тушунмаслигини айтган эди.