Украина президенти Володимир Зеленский Швейцарияда ўтадиган тинчлик конференциясида Россия ва Хитойнинг қатнашмаслигини рўкач қилиб, саммитни бузишга уринишда айблади. Бунга жавобан, Хитой Халқ Республикаси Зеленскийнинг сўзларини рад этиб, икки давлат уруши атрофидаги тинчлик чораларини қўллаб-қувватлашини маълум қилган.

Хитой ташқи ишлар вазирлиги матбуот котиби Мао Нинг тинчлик саммитига тўхталар экан, мамлакат позицияси доим очиқ ва ошкораликдан иборатлигини таъкидлаган.

Якшанба куни Сингапурда нутқ сўзлаган Украина президенти Хитой ва Россия бошқа давлатларга бўлажак музокараларда қатнашмаслик учун босим ўтказаётганини айтган.

Хитой Россиянинг Украинага босқинидан кейин Москва билан алоқаларни чуқурлаштирган бўлса ҳам урушда бетарафлигини таъкидлаб келади. Владимир Путин қайта сайланганидан кейин апрел ойида биринчи ташрифини Пекиндан бошлаб, Хитой раҳбари билан бир пиёла чой устида музокара олиб борган эди.

АҚШ, Украина ва бошқа давлатлар разведка идоралари Хитой ўз иттифоқчисини тўғридан-тўғри қуроллантирмаса-да Россия қуроллари Хитойда ишлаб чиқарилган қисмлардан ташкил топганини айтиб келади.