Фото: AP Photo

Туркия Буюк Миллат Мажлиси Швециянинг НАТОга аъзолигини ратификация қилишни маъқуллади. Бу ҳақда “TRT Haber” телеканали хабар бермоқда.

Манбада айтилишича, 346 депутатдан 287 нафари ташаббусни қўллаб-қувватлаган, 55 нафари қарши, тўрт нафари бетараф қолган.

Парламент қарори мамлакат президенти Режеп Таййип Эрдоған томонидан имзоланган фармондан сўнг кучга киради. Ҳужжат расмий ҳукумат нашри — “Resmi Gazete”да эълон қилинади. Давлат раҳбари фармонни имзолаш масаласини 15 кун ичида кўриб чиқишга ҳақли.

Швеция 2022 йил май ойида Финляндия билан биргаликда Шимолий Атлантика альянсига ариза топширди. Финляндия ўтган йилнинг 4 апрелида блокнинг 31-аъзосига айланди.

Стокгольм Венгрия ва Туркиянинг розилигини ҳали олмаган. Шундай қилиб, Анқара сўровнинг ратификация қилинишини Стокгольмнинг терроризмга қарши кураш бўйича ваъдаларини бажариши билан боғлайди.

Дастлаб, 2022 йилнинг 28 июнь куни Швеция полицияси мусулмонларнинг Қурбон ҳайити байрамининг биринчи кунида Стокголмдаги бош масжид олдида Қуръони Карим китобини ёқиш акциясига рухсат берган эди. Ўз навбатида, Европа Иттифоқи ушбу ҳодисани қоралади, лекин улар сўз эркинлигини ҳимоя қилишларини таъкидлади.

Ўтган йилнинг 21 январь куни Даниянинг Ислом динига қарши “Stram Kurs” партияси раҳбари Расмус Палудан Туркиянинг Стокгольмдаги элчихонаси олдида Қуръонни ёқиб юборди.

Акция шаҳар маъмурияти билан келишилган ва Палудан бундай чиқиш учун тўловни амалга оширган. Бундан ташқари, Стокгольм маъмурияти маҳаллий курдларга ҳам намойиш ўтказишга рухсат берган ва унда 50 га яқин одам йиғилган.

Ушбу воқеалардан сўнг Туркия Швецияни НАТОга аъзо бўлиш масаласига қаршилик кўрсатиб келаётганди.

Хусусан, Туркия президенти Режеп Таййип Эрдоған Стокгольмдаги Туркия элчихонаси яқинида Ислом динининг муқаддас китоби — Қуръон ёқиб юборилиши билан боғлиқ воқеадан сўнг Швеция НАТОга аъзолик масаласида Туркия ёрдамига умид қила олмаслигини айтганди.

“Швециядаги, ҳаттоки дипломатик ваколатхонамиз яқинидаги бу нопок ҳаракатлар мусулмонлар, умуман, барча инсонлар, барча ҳуқуқ ва эркинликларни ҳақорат қилиш ҳисобланади”, деган эди Туркия президенти.

Унинг сўзларига кўра, Швеция Шимолий Атлантика альянсига киришда “энди ёрдам кутмаслиги керак”, чунки мамлакат “террорчиларни қўллаб-қувватлашда давом этмоқда”.

Туркия парламенти спикери Нуман Куртулмуш Швециянинг НАТОга аъзо бўлиш эҳтимоли ҳақида фикр билдириб, “Швециянинг НАТОга аъзо бўлишини амалга ошмайдиган бир орзу” деганди.

“Туркия сўз учун масъул давлат. У нима деса, нимани ваъда қилса, бажаради, лекин биз ҳам бошқаларни ўз сўзида туришини истаймиз. Ўз ваъдаларини бажармаётган Швеция учун НАТОга аъзо бўлишни кутиш шунчаки орзу”, — деган эди сиёсатчи.