Франция пойтахтида ўтказилаётган ёзги Олимпиада ўйинларида ўзбек спортчилари ўз иштирокларини давом эттирмоқда.

Оғир атлетика бўйича Ўзбекистон терма жамоаси аъзоси Акбар Жўраев «Париж-2024» ёзги Олимпиада ўйинларидаги иштирокини бошлаб олди.

Эркаклар ўртасида +102 кг вазн тоифасида қатнашаётган ҳамюртимиз ўзининг даст кўтаришдаги чиқишларини якунлади.

Унда ҳамюртимиз Акбар Жўраев 185 кг натижа қайд этди. Юртдошимиз ҳозирча 3-ўринда кетмоқда. Акбардан олдинда турган икки спортчи атиги бир килограммга яхшироқ натижа кўрсатишган.

Маълумот учун айтиш мумкинки, Акбар Хуснидилла ўғли Жўраев 1999 йил 8 октябрда Тошкент вилояти Ғазалкент шаҳрида таваллуд топган. Акбар 109 кг вазн тоифасида «Осиё чемпионати – 2019» кумуш медали совриндори, 2019 йилги ёшлар ўртасидаги жаҳон чемпионати ғолиби ҳисобланади. У 2020 йил Токиода Олимпиада чемпиони бўлганди.

Бунгача Ҳасанбой Дўсматов ва Асадхўжа Мўйдинхўжаев «Париж-2024»нинг бокс беллашувларида олтин медалларни қўлга киритганди.