Тошкент архитектура-қурилиш университети ректори Баҳром Тўлаганов бир вақтнинг ўзида тадбиркорлик билан ҳам шуғулланиб келгани аниқланди. Бу ҳақда Коррупцияга қарши курашиш агентлиги матбуот котиби матбуот котиби Шерзод Сапаров маълум қилди.

Билдирилишича, агентлик «Қамчиқавтойўл» ихтисослаштирилган йўллардан фойдаланиш» давлат муассасаси томонидан ўтказилган танловда Тошкент архитектура-қурилиш университети ректори Баҳром Тўлагановга тегишли фирма иштирок этгани ҳақидаги хабарлар юзасидан ўрганиш ўтказган.

«Ўрганишда Б.Тўлаганов ҳақиқатан ҳам бир вақтнинг ўзида мазкур танлов ғолиби «B-TEC» МЧЖнинг ягона таъсисчиси экани, шунингдек, «INTRABAU» МЧЖда ҳам улушга эгалиги ўз тасдиғини топди.

Мазкур ҳолатда Б.Тўлаганов томонидан қатор қонунчилик ҳужжатлари талаблари бузилишига йўл қўйилган», дейилади хабарда.

Қўшимча қилинишича, Олий таълим, фан ва инновациялар вазирлигига қайд этилган қонунбузилиши ҳолатини бартараф этиш юзасидан тақдимнома киритилган.