Украиналик экспертларнинг фикрича, Россиянинг 50 минг нафарга яқин аскари Суми ва Харков ҳудудларини эгаллашга ҳозирлик кўрмоқда.

Украина қўшинлари узоқ кутилган ҳарбий ёрдам пакетларини қабул қилиб олаётган бир пайтда Москва кичик ва тактик ютуқларга эришишда давом этяпти. Украина, шунингдек, душман қўшинлари ўзининг шимолий чегарасида аскар тўплаётгани ва потенциал янги фронт яратиш ҳаракатида эканлигини маълум қилди. «The Economist»га кўра, қўшинлар май ойи охири ёки июннинг бошида Украинага кириши мумкин.

Бундай кескин вазиятда Европа Иттифоқига ҳаддан ортиқ ишониб қолмасдан Украина ўзининг мудофаа саноати базасини мустаҳкамлашга ҳаракат қилмоқда.

Украинанинг Жанубий қўшинлари матбуот котиби Дмитрий Плетенчукнинг сўзларига кўра, рус аскарларининг олдида катта тўсиқ бўлган Днепр дарёси турибди. Улар ҳудудни енгиб ўтиш учун сув кемаларидан фойдаланишга мажбур, лекин улар ҳозирда қуруқликда жанг қиляпти. Душман кучлари бир ҳафта давомида Днепр дельтасининг ўнг қирғоғида Украина кучларини таъқиб қилган. Аммо 28 апрелда Украина қайтариб олишга муваффақ бўлган Нестрига оролини эгаллашга бўлган уринишлар бесамар кетган. Россия кучлари шарқдаги стратегик аҳамиятга эга Часов Яр шаҳрини ҳам қўлга кирита олмади.

Украина парламентарийларининг «Al-Jazeera» телеканалига айтишича, Украина ўн минглаб қўшинларини мамлакат шимолида душман режаларига қарши сақлаб турибди. Украина Қуролли Кучлари Олий Бош Қўмондони Александр Сирский шимол кучларини кучайтириш учун фронтга қўшимча артиллерия ва танклар юбораётганини айтди.

Евродаги хавотирлар
«New York Times» газетасининг хабар беришича, 28 апрель куни танкка қарши ракета, снаряд ва 155 мм артиллерия ўқларининг биринчи партияси АҚШдан Украинага етиб келган. Европалик иттифоқчилар кези келганда мудофаа операцияларини ўтказиш учун ҳам қурол етказиб бера олмади. Чунки Совуқ урушдан буён Европанинг мудофаа саноат базаси сезиларли даражада қисқарган.

Европалик етакчи ва қўмондонлар ўз давлатларини тинч сақламоқчи бўлишса, қитъа уруш давридаги иқтисодиёт ва саноатга ўтиш зарурлигини англаб етмоқда.

Хусусан, Франция президенти Эммануэль Макронга кўра, Россия каби ҳеч қандай чеклов ва чегараси йўқ куч билан тўқнашганда Европа ўзини ҳимоя қилиш учун қуролланмаган. Шунингдек, унинг айтишича, қитъа ўз манфаатларини ҳимоя қилиш қобилиятига эга бўлиши шарт. Шу ўринда Франция раҳбари яна бир бор зарурат туғилганда Киевга аскарларини жўнатиш мумкинлигини инкор қилмади.

Украина разведкаси бошлиғи ўринбосари Вадим Скибицкийнинг айтишича, Россия Болтиқбўйи давлатларини бир ҳафта ичида босиб олиши мумкин. НАТОнинг уларга ёрдам бериш жараёнини бошлаш учун камида 10 кун вақт кетади. Европанинг қолган қисмида Россия таҳдидини англаш билан бир қаторда Украинага ёрдам бериш зарурати ортиб бормоқда.

НАТО Бош котиби Йенс Столтенбергнинг таъкидлашича, Россиянинг гибрид фаолияти, жумладан, нотўғри маълумотлар тарқатиш, жосуслик ва бошқа кампаниялари Европада аллақачон иш бошлаган.