Париждаги Олимпиада ўйинларида қирғизистонлик боксчига секундантлик қилган ўзбекистонлик мураббий Акмал Ҳасанов Қирғиз Республикасининг халқаро жамоат бирлашмаси томонидан «Чингиз Айтматов» медали билан тақдирланди. Бу ҳақда «24.kg» нашри хабар берди.

Маълум қилинишича, «Чингиз Айтматов номидаги Иссиқкўл форуми» халқаро жамоат бирлашмаси ўзбекистонлик мураббийни инсонийлик, бағрикенглик ва халқ дипломатиясининг юксак савияси учун мукофотлаш тўғрисидаги қарор қабул қилган.

«Акмалга инсонийлиги ҳамда биродарлик муносабати учун раҳмат. Биз буни қадрлаймиз, ҳурмат қиламиз ва қойил қоламиз. Мамлакатимизга келишингизни интиқлик билан кутамиз. Сиз барча мақтов ва мукофотларга лойиқсиз», деган халқаро жамоат бирлашмаси бош котиби Ассол Молдокматова.

Эслатиб ўтамиз, Парижда ўтаётган ёзги Олимпиада ўйинларида 4 августга ўтар кечаси қирғизистонлик боксчи Мунарбек Сейитбек ўғли америкалик Ҳарвей Жаҳмалга қарши чорак финал жангини ўтказиб, ярим финалга чиққанди. Жанг давомида унга Ўзбекистон делегациясидан борган мураббий Акмал Ҳасанов секундантлик қилган.

Қайд этиш керакки, ярим финалда Мунарбек болгариялик Хавиер Ибанез Диазга қарши рингга кўтарилади. Айни вазн тоифасидаги иккинчи ярим финалда ўзбекистонлик Абдулмалик Ҳалаков ҳам жанг қилади.

Маълумот учун айтиш мумкинки, Қирғизистон боксчилари 1996 йилдан буён Олимпиада ўйинларида иштирок этиб келишади. Мунарбек Сейитбек ўғлигача қирғиз боксчилар орасидаги энг яхши натижа «Сидней-2000» Олимпиадасида 8-ўрин эди.

Аввалроқ, испанлар Шахриёр Маҳкамовни Олимпиададаги иштирокини якунлашига сабаб бўлганди.