«Toyota Мотор» 2024 йилда 10,8 миллион дона автомобиль сотганини эълон қилди. Бу кўрсаткич япон автомобиль ишлаб чиқарувчисини кетма-кет бешинчи йил дунёнинг энг йирик автомобиль сотувчиси сифатида ўз мақомини ушлаб қолиш имконини берди. Шунга қарамасдан, компаниянинг глобал савдоси аввалги йилга нисбатан 3,7% га камайди. Бу кўрсаткич «Toyota» гуруҳига кирувчи «Daihatsu» ва юк машиналари ишлаб чиқарувчи «Hino Motors» компаниялари савдоларини ҳам ўз ичига олади.

«Toyota» автомобиллари савдосининг пасайиши асосан Японияда кузатилган. Бу ерда компания сертификатлаш тестлари билан боғлиқ муаммолар сабабли жиддий қийинчиликларга дуч келган, айниқса «Daihatsu» брендида. Япон автомобиль гигантининг энг яқин рақиби бўлган «Volkswagen Group» 2024 йилда 9 миллион дона автомобиль сотганини маълум қилди. Немис ишлаб чиқарувчиси ҳам 2023 йилга нисбатан 2,3% пасайишни қайд этган, бу эса асосан Хитой бозоридаги «нархлар уруши» ва Германияда харажатларни қисқартириш ҳаракатлари билан боғлиқ.

«Toyota» бренди остида, шунингдек, «Лехус» автомобиллари билан бирга, компаниянинг «фақат ота-компания» деб аталадиган савдоси 2024 йилда 1,4% га пасайди ва 10,2 миллион донани ташкил этди. Бунга Япониядаги икки рақамли пасайиш сабаб бўлди. Шунга қарамай, компания умумий сотув ҳажмини рекорд даражага етказишга муваффақ бўлди. Бу, асосан, АҚШ бозорида «Toyota» гибрид автомобилларига бўлган талабнинг ортгани билан изоҳланмоқда.

Хитой бозори «Toyota» учун жиддий қийинчилик туғдириб, ширкатнинг бу мамлакатдаги савдоси 6,9% га қисқарди. Сабаби Хитойда автомобиль ишлаб чиқарувчилар ўртасида нархлар бўйича кескин рақобат юзага келган. «Toyota» автомобиллари орасида гибрид двигателларга эга моделлар рекорд даражада – 40,8% улушни эгаллаган. Тўлиқ электр автомобиллар эса компаниянинг умумий савдосида 1,4% ни ташкил қилди.

«Toyota» глобал автомобиль бозорида етакчилигини сақлаб қолиш учун гибрид технологияларга эътибор қаратишда давом этмоқда. Шунингдек, компания Хитой ва Япониядаги савдо пасайишининг олдини олиш мақсадида янги стратегияларни ишлаб чиқиши кутилмоқда.

Қайд этиш керакки, дунёдаги энг машҳур автомобиль ишлаб чиқарувчиларидан ҳисобланган «Mercedes-Benz» ва «BMW» ҳатто 3 миллион донадан ҳам ўз суперкарларини сота олмаган. Икки компания ҳам 2023 йилга нисбатан 2024 йилда мос равишда 3 ва 4 фоизлик «чўкиш»ни қайд этган.