Коронавирус пандемияси туфайли жорий этилган карантин шароитида кун тартибига чиққан ушбу шиор остида жамиятимиз ривожланиши узлуксизлигини таъминлаш йўлида функционал фаолиятини давом эттираётган тизимлардан бири давлат хизматлари марказидир.

Мана шундай мураккаб шароитда ҳам Марҳамат туман давлат хизматлари маркази томонидан фуқароларга тегишли тартибда тушунчалар бериш билан бирга, аксарият юртдошларимизнинг ишлари муҳимлиги ҳисобга олиниб, карантин ва инфекция юқиши ва тарқалишининг олдини олиш бўйича белгиланган тартибларга амал қилинган ҳолда уларга зарур хизматлар кўрсатилмоқда.

Марказ директори Фахриддин Комилжоновнинг маълум қилишича, карантин эълон қилинган кундан бошлаб, бугунги кунга қадар марказга фуқаролар ва тадбиркорлик субъектларидан 11 минг 298 та ариза келиб тушган. Бу ҳақда ДХА Андижон вилояти бошқармаси ахборот хизмати маълум қилди.

Қайд этилишича, мурожаатларнинг асосий қисмини СТИР олиш ва аниқлаш, кадастр паспортини шакллантириш, фарзанд туғилганда бериладиган бир марталик нафақа пулини олиш учун ариза бериш, судланмаганлик тўғрисида, пенсия ҳақида маълумотномаларни олиш каби хизматлар ташкил этмоқда.

Шунингдек, карантин даврида 482 та янги тадбиркорлик субъекти рўйхатдан ўтказилган бўлиб, уларнинг 294 таси якка тартибдаги тадбиркордир.

Куни кеча Давлат хизматлари агентлиги вилоят бошқармаси бошлиғи Маҳмуджон Абдижалиев Марҳамат туманида бўлиб, ушбу марказда аҳолига яратилаётган қулайликлар билан танишди.

Учрашув мобайнида бошқарма бошлиғи марказ ходимларини карантин ва санитария-гигиена қоидаларига қатъий риоя қилишга чақирди.