Фото: МСК

Марказий сайлов комиссияси раиси З. Низомхўжаевнинг Ислом ҳамкорлик ташкилоти (ИҲТ) кузатувчилар миссияси раҳбари Анисул Хак билан учрашуви бўлиб ўтди.

Мулоқот давомида миссия аъзолари Ўзбекистон Республикаси Президенти сайловига тайёргарлик кўриш ва уни ўтказиш доирасида амалга оширилаётган ишлар билан танишди.

Таъкидланганидек, сайлов кампанияси тадбирлари Сайлов кодекси талаблари ва демократик принципларга мувофиқ амалга оширилмоқда.

МСК раиси ўз сўзида 14 октябрдан мамлакатимизда муддатидан олдин овоз бериш жараёни бошлангани ва бу жараён 20 октябрнинг якунига қадар давом этишини қайд этиб ўтди. Шунингдек, Марказий сайлов комиссияси томонидан халқаро кузатувчилар ва ОАВ вакилларини аккредитациядан ўтказиш жараёни тугаганлиги ҳамда шу кунга қадар Ўзбекистон Республикаси Президенти сайловида қатнашадиган хорижий давлатлар ва халқаро ташкилотлардан кузатувчилар сони мингга яқинни ташкил этганлиги таъкидланди.

Қайд этиш жоиз, Ислом ҳамкорлик ташкилоти (ИҲТ) сайловларни кузатиш миссиясига ИҲТ Бош котибиятининг Халқаро муносабатлар департаменти директори Анисул Хак бошчилик қилади.

«Халқ сўзи».