Фото: Reuters

Японияда 2 миллиондан ортиқ уй хўжаликлари мамлакат шимоли-шарқидаги кучли зилзиладан кейин электр таъминотисиз қолган. Бу ҳақда TEPCO энергетика компания хабар бермоқда.

Хусусан, бутун мамлакат бўйлаб тахминан 2,099 миллион хонадонда электр таъминотида узилишлар қайд этилган бўлиб, улардан 703,3 мингтаси Токио, 218 мингтаси Тиба префектураси, 307 мингтаси Канагава префектураси ва 298 мингтаси Сайтама префектурасига тўғри келмоқда.

Шунингдек, «Фукусима-1» ва «Фукусима-2» АЭС оператори TEPCO кучли зилзиладан кейин объектларга етиши мумкин бўлган зарарни ўрганмоқда.

«Ҳозирда биз ушбу зилзила жиҳозларимизга таъсирини баҳолаяпмиз», дейилади компания баёнотида. 

Аввал хабар берганимиздек, бугун маҳаллий вақт билан 23:36да Япония шимоли-шарқида Тинч океанида Фукусима префектураси яқинида 7,3 магнитудали зилзила содир бўлди. Унинг ўчоғи 60 километр чуқурликда қайд этилган. Ер силкинишидан сўнг цунами хавфи эълон қилинган. Зилзила таъсири мамлакатнинг шимоли-шарқидаги ва шимолидаги префектураларида ҳам сезилган. Жумладан, пойтахт Токиода кучли тўлқинли силкинишлар сезилган. Қурбонлар ва вайронагарчиликлар ҳақида маълумот йўқ.