Бугун, 9 февралдан бошлаб Ховос туманининг “Қаҳрамон” маҳалласида фаолият юритган давлат хизматлари маркази филиали қайта жиҳозланиб, янги иш режимига ўтди. Тантанали маросимда адлия вазири Акбар Тошқулов иштирок этди.

Ушбу маҳалла 2004 йилга қадар Меҳнатобод тумани тасарруфида бўлган, туман тугатилгандан сўнг Ховос тумани ҳудудига ўтган. Ҳозирда “Қаҳрамон” маҳалласида беш минг нафарга яқин аҳоли истиқомат қилади. Маҳаллада Ховос туман давлат хизматлари маркази филиали фаолият юритади. Туман марказидан 35 — 40 км. масофа олисда жойлашган маҳаллада филиал томонидан ён атрофдаги “Бинокор”, “Бўстон”,“Пахтакор”, “Ҳуснобод”, “Янгиер” маҳаллалари фуқароларига ҳам хизмат кўрсатилмоқда.

Бугунга қадар мазкур филиал орқали юқорида қайд этилган 6 та маҳалла аҳолиси ҳафтанинг сешанба ва жума кунлари давлат хизматларини олиш имкони мавжуд эди. Эндиликда филиал душанбадан жума кунигача соат 9:00 дан 18:00 га қадар доимий иш режимида ишлайди. Мақсад — аҳолини бир ҳужжатни деб овора қилмаслик, фуқароларга қулайлик яратишдир.

Ховослик фуқаролар энди ўзларига қулай вақтда ўз маҳалласида кўрсатилаётган хизматдан фойдаланиши мумкин. Филиалда ташриф буюрувчилар учун барча қулайликлар мавжуд. Шинам хона, интернетга уланган компьютер тўплами, давлат хизматлари ва улардан фойдаланиш бўйича ҳақида маълумот берувчи ахборот бурчаклари ва бошқалар шулар жумласидан. Аҳоли оммабоп бўлган 100 дан ортиқ давлат хизматларидан фойдаланиш имконига эга бўлди.

Шу куни филиалда ФҲДЁ бўлими томонидан ёш оиланинг никоҳи қонуний қайд этилди. Шунингдек, “Ҳеч бир шахс ҳужжатсиз қолмайди” ҳуқуқий акцияси доирасида 7 нафар ховослик фуқарога ҳужжатлар топширилди.