Хитой савдо вазирлиги АҚШ президенти Дональд Трампнинг Хитойга қўшимча 50 фоизлик бож жорий этиш ҳақидаги таҳдидларига жавобан «охиригача курашишга» ваъда берди.

«АҚШнинг Хитойга божларни ошириш ҳақидаги таҳдиди нотўғри ва яна бир бор Қўшма Штатларнинг шантаж характерини кўрсатмоқда. Хитой бунга ҳеч қачон рози бўлмайди. Агар АҚШ бунга қатъий жазм этса, Хитой охиригача курашади», — дея қайд этди вазирлик.

Вазирлик вакилининг қўшимча қилишича, Вашингтоннинг Пекинга божлар жорий этиши ҳеч қандай асосга эга бўлмаган «бир томонлама қўрқитишнинг одатий амалиёти»дир. Агар АҚШ ўз сиёсатини қатъийлаштирса, Хитой ўз ҳуқуқ ва манфаатларини ҳимоя қилиш учун қарши чоралар кўради.

Эслатиб ўтамиз, аввалроқ АҚШ президенти Дональд Трамп Хитойни ўзи жорий этган 34 фоизлик божлардан воз кечишга чақирган, акс ҳолда Қўшма Штатлар Хитойдан импорт қилинадиган маҳсулотларга бож тўловларини яна 50 фоизга оширади. Қўшимча 50 фоизлик бож президент томонидан Хитойнинг барча импортларига жорий қилган 34 фоиз, шунингдек, амалда бўлган 20 фоизлик божга қўшимча бўлади. Натижада, Хитой учун умумий тариф 100 фоиздан ошиши мумкин.