Исроил Ғазо шаҳрининг «Шужая» маҳалласидаги турар-жой биноларига бир неча бор ҳужум уюштирди, деб хабар бермоқда «Al Jazeera» нашри.

Маълум қилинишича, бугун, 10 апрель куни Исроил ҳарбийлари Ғазо ҳудудидаги турар-жой биноларига қилган ҳужуми оқибатида 35 киши ҳалок бўлган, 55 нафари эса турли даражадаги тан жароҳатлари олиб шифохонага ётқизилган. Дастлабки маълумотларга кўра, яна 80 нафарга яқин фаластинлик вайроналар остида бедарак йўқолган.

Ҳужумга гувоҳ бўлган маҳаллий аҳоли вакилларининг сўзларига кўра, Исроил ҳарбийлари тинч аҳолини геноцид қилишда давом этмоқда.

«Мазкур ҳужумларни бошқача таърифлаб бўлмайди. Улар инсонларни қириб ташлашни мақсад қилган. Шифохоналар ўнлаб оғир беморлар билан тўлган. Омон қолганларни сақлаб қолиш учун мунтазам равишда қон қуйилиши зарур бўлмоқда», — дейди маҳаллий аҳоли вакиллари.

Ғазо Соғлиқни сақлаш вазирлиги маълумотларига кўра, Исроилнинг Ғазога қарши урушида бугунги кунга қадар 50 минг 846 нафар фаластинлик ҳалок бўлган. 115 минг 729 киши турли даражадаги тан жароҳатлари олиб шифохоналарга ётқизилган. Маҳаллий ҳукумат расмийлари вайроналар остида бедарак йўқолган минглаб инсонларни вафот этганини тахмин қилмоқда.