Бош прокуратура ҳузуридаги Департаментнинг Тошкент шаҳар бошқармаси томонидан ўтказилган терговга қадар текширувда, “T.B.” МЧЖ масъул шахслари Автобетонасос техникасини харид қилиш учун тижорат банки филиалидан ажратилган 2,5 млрд сўм имтиёзли кредит маблағини нақдлаштириб олишга эришиб, ушбу маблағларни шахсий эҳтиёжларига сарфлаб юборганликлари аниқланган.

Шу каби, Департаментнинг Чирчиқ шаҳар бўлими томонидан ўтказилган терговга қадар текширувда, “E.t.” МЧЖда кассир вазифасида ишлаган Д.У. ва С.С. ўзаро тил бириктириб, МЧЖ мижозлари томонидан тўланган кредит тўловларини кирим қилмасдан жами 276,9 млн сўмни ўзлаштириш йўли билан талон-торож қилганликлари аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.