Бош прокуратура ҳузуридаги Департаментнинг Учтепа тумани бўлими, ДХХ ва Божхона бошқармаси ходимлари ҳамкорлигида тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Тезкор тадбир давомида қонунга хилоф равишда тамаки маҳсулотлари савдоси билан шуғулланиб келган шахслар аниқланган.

Жумладан, фуқаро А.Т. ва бошқалар «Gentra» русумли автомашинасида хорижда ишлаб чиқарилган Ўзбекистон Республикаси акциз маркаси билан елимланмаган умумий баҳоси 174,1 миллион сўмлик жами 2894 қути тамаки маҳсулотини Тошкент шаҳарида сотиш мақсадида олиб келганликлари ойдинлашган.

«Тезкор тадбир ходимлари томонидан аниқланган тамаки маҳсулотлари ашёвий далил сифатида олиб қўйилган», дейилади хабарда.

Мазкур ҳолат юзасидан Жиноят кодексининг 25, 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.