Фото: “Халқ сўзи”

Фарғона вилояти ҳокими Хайрулло Бозоров чиқиндиларни қайта ишлашда дунёда етакчи мавқега эга Финляндиянинг “SETCleanTech” компанияси ижрочи директори Ёуни Суомалайнен ҳамда унинг ишончли ҳамкори – Италиянинг “Giunone Consult & Communications Pte. Ltd” компанияси вакиллари билан онлайн учрашув ўтказди.

Фарғона вилояти ҳокимлиги ахборот хизматининг хабар беришича, учрашувда вилоятда “SETCleanTech” компанияси томонидан ишлаб чиқарилаётган Tyrannosaurus қаттиқ чиқиндиларни автоматик ажратиш ва қайта ишлаш тармоғини жорий этиш масаласи кўриб чиқилди.

Айтиш жоиз, дунёнинг энг илғор технологияларига асосланган ушбу тармоқдан кўплаб хорижий мамлакатларда фойдаланилмоқда. Бу технология орқали ёнмайдиган чиқиндилар ажратиб олингач, қолган чиқиндилардан асосан цемент заводларида фойдаланишга мўлжалланган SRF ёқилғиси ишлаб чиқарилади. Бу эса бундай корхоналарнинг ёқилғи учун сарфланадиган харажатларини камайишига олиб келади.

Онлайн мулоқотда Фарғонада “SETCleanTech” компанияси томонидан маҳаллий тадбиркорлар билан ҳамкорликда замонавий технологияларни жорий этиш ҳамда Европа ва жаҳон молиявий институтларининг кредит маблағларини жалб этиш бўйича биргаликда лойиҳа ишлаб чиқиш борасида келишиб олинди.

Ботир МАДИЁРОВ, “Халқ сўзи”.