Фото: «Халқ сўзи»

Фарғона вилояти ҳокимлигида Қувайтнинг “Gulf Care General Trade” ҳамда “Royal Mining Group” компаниялари вакиллари билан учрашув бўлиб ўтди.

Унда ушбу юрт тадбиркорлари билан ҳамкорликда тиббиёт ва фармацевтика, энергетика, қурилиш ҳамда тоғ-кон саноати соҳаларига инвестиция киритиш имкониятлари кўриб чиқилди.

Таъкидлаш жоизки, Қувайтнинг “Gulf Care General Trade” компанияси томонидан Фарғонада марказлашган лаборатория, радиология маркази қуриш лойиҳаларини ҳаётга татбиқ этиш режалаштирилмоқда. Шунингдек, қувайтлик шифокорларни вилоятга жалб этган ҳолда эҳтиёжманд оила фарзандларида мураккаб жарроҳлик амалиётлари ўтказиш ҳамда вилоятдан саралаб олинган шифокорларни тажриба алмашиш учун Қувайтга юбориш кўзда тутиляпти.

Ўз навбатида хорижликлар фармацевтика маҳсулотлари ишлаб чиқариш корхонасини барпо этиш, вилоят марказида қад ростлаётган Экошаҳар ҳудудидаги қурилиш жараёнларида ўз лойиҳалари билан иштирок этишни мақсад қилишган.

Учрашувда “Gulf Care General Trade” компаниясига Фарғона вилоятида хорижий корхона сифатида давлат рўйхатидан ўтказилганлиги тўғрисидаги гувоҳнома топширилди.

Фарғона вилояти ҳокими Хайрулло Бозоров истиқболли лойиҳалар бўйича амалий ишларга киришилганидан мамнун эканлигини таъкидлаб, бу борада ҳар томонлама кўмак берилишини билдирди.

Мулоқот якунида режалаштирилаётган ишлар бўйича “Йўл харитаси” ишлаб чиқилиб, ижросига киришишга келишиб олинди.

Ботир МАДИЁРОВ, “Халқ сўзи”.