Бош прокуратура ҳузуридаги Департамент томонидан бир нечта кредит маблағларини ўзлаштириш ҳолатлари аниқланди. Бу ҳақда Департаментнинг ахборот хизмати маълум қилган.

Департаментнинг Боёвут туман бўлими томонидан ўтказилган терговга қадар текширишда «Б-М.» МЧЖ масъул шахслари ва бошқалар мактабгача таълим муассасасини реконструкция қилиш учун тижорат банки филиалидан ажратилган имтиёзли кредит маблағининг 549,6 миллион сўмини ўзлаштириш йўли билан талон-торож қилганликлари аниқланган.

Шунингдек, Оқдарё туманида фаолият юритувчи «М.Б.» МЧЖ раҳбари О.Ш. ҳудудий тижорат банки филиалидан ажратилган 1 миллиард сўм имтиёзли кредит эвазига харид қилинган маиший техника воситалари ва юмшоқ мебелларни нақд пулга сотиб юбориб, 850 миллион сўмни ўзлаштириш йўли билан талон-торож қилганлиги маълум бўлди.

«Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ энди кредит тарихини беркитиб қўйиш мумкин бўлиши ҳақда хабар берган эдик.