Bosh prokuratura huzuridagi Departament tomonidan bir nechta kredit mablagʻlarini oʻzlashtirish holatlari aniqlandi. Bu haqda Departamentning axborot xizmati maʼlum qilgan.

Departamentning Boyovut tuman boʻlimi tomonidan oʻtkazilgan tergovga qadar tekshirishda “B-M.” MCHJ masʼul shaxslari va boshqalar maktabgacha taʼlim muassasasini rekonstruksiya qilish uchun tijorat banki filialidan ajratilgan imtiyozli kredit mablagʻining 549,6 million soʻmini oʻzlashtirish yoʻli bilan talon-toroj qilganliklari aniqlangan.

Shuningdek, Oqdaryo tumanida faoliyat yurituvchi “M.B.” MCHJ rahbari O.Sh. hududiy tijorat banki filialidan ajratilgan 1 milliard soʻm imtiyozli kredit evaziga xarid qilingan maishiy texnika vositalari va yumshoq mebellarni naqd pulga sotib yuborib, 850 million soʻmni oʻzlashtirish yoʻli bilan talon-toroj qilganligi maʼlum boʻldi.

“Mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq endi kredit tarixini berkitib qoʻyish mumkin boʻlishi haqda xabar bergan edik.