Саминжон ҲУСАНОВ/«Халқ сўзи». Андижон вилояти Марҳамат туманидаги «Янги ҳаёт» МФЙ адирликда жойлашган. Бу эса тоза ичимлик суви таъминотида ўзига хос муаммоларга сабаб бўлаётган эди. Негаки, туманни «оби ҳаёт» билан таъминловчи «Каркидон» сув сақлаш иншооти ҳам ушбу манзилдан 100 метр қуйида жойлашган. Маҳаллада ҳукм суриб келган муаммони бартараф этиш учун қурилиш ишлари амалга оширилди.

— Натижада иккита сув сақлаш иншооти барпо этилди, — дейди «Андижон сув таъминоти» АЖнинг тумандаги филиали ходими Сайдулло Эсонбоев. — Шу билан бир қаторда 13 км. масофага сув қувури тортилди. Ҳозирда ҳар бир хонадоннинг ичига сув жўмраклари ўрнатилди.

Лойиҳанинг фойдаланишга топширилиши шу ерда истиқомат қилувчи аҳоли учун ҳақиқий байрамга айланди. Боиси, уларнинг узоқ йиллик орзулари амалга ошди.

— 45 йилдирки, ушбу маҳаллада истиқомат қиламан, — дейди меҳнат фахрийси Набижон Абдусаматов. — Ортда қолган йиллар давомида ичимлик сувини маълум масофадан ташиб келишга тўғри келди. Амалга оширилган бу хайрли ишларни кўриб, масъулларни дуо қилмоқдамиз.

Бугунги кунда Марҳамат туманидаги аҳолининг сувлашганлик даражаси 85 фоизни ташкил этмоқда. Йил якунига қадар бу кўрсаткич кескин ўзгаради. Зеро, таъминотни яхшилаш борасидаги ишлар туманнинг бошқа манзилларида ҳам давом этяпти.