Saminjon HUSANOV/“Xalq soʻzi”. Andijon viloyati Marhamat tumanidagi “Yangi hayot” MFY adirlikda joylashgan. Bu esa toza ichimlik suvi taʼminotida oʻziga xos muammolarga sabab boʻlayotgan edi. Negaki, tumanni “obi hayot” bilan taʼminlovchi “Karkidon” suv saqlash inshooti ham ushbu manzildan 100 metr quyida joylashgan. Mahallada hukm surib kelgan muammoni bartaraf etish uchun qurilish ishlari amalga oshirildi.

— Natijada ikkita suv saqlash inshooti barpo etildi, — deydi “Andijon suv taʼminoti” AJning tumandagi filiali xodimi Saydullo Esonboyev. — Shu bilan bir qatorda 13 km. masofaga suv quvuri tortildi. Hozirda har bir xonadonning ichiga suv joʻmraklari oʻrnatildi.

Loyihaning foydalanishga topshirilishi shu yerda istiqomat qiluvchi aholi uchun haqiqiy bayramga aylandi. Boisi, ularning uzoq yillik orzulari amalga oshdi.

— 45-yildirki, ushbu mahallada istiqomat qilaman, — deydi mehnat faxriysi Nabijon Abdusamatov. — Ortda qolgan yillar davomida ichimlik suvini maʼlum masofadan tashib kelishga toʻgʻri keldi. Amalga oshirilgan bu xayrli ishlarni koʻrib, masʼullarni duo qilmoqdamiz.

Bugungi kunda Marhamat tumanidagi aholining suvlashganlik darajasi 85 foizni tashkil etmoqda. Yil yakuniga qadar bu koʻrsatkich keskin oʻzgaradi. Zero, taʼminotni yaxshilash borasidagi ishlar tumanning boshqa manzillarida ham davom etyapti.